Ndonëse edhe botërisht ish-kryeministri i Maqedonisë, lideri i VMRO-DPMNE-së, Nikolla Gruevski njihet me politikat e tij nacionaliste dhe antishqiptare, ka edhe prej tyre që nuk e ndajnë të njëjtin mendim. Të tillë janë “Forumi i Patriotëve Mendjelirë” i përbërë nga kategori e ndryshme të personaliteteve maqedonase. Këta publikisht kanë reaguar duke dënuar, sipas tyre politikën dyfytyrëshe të Nikolla Gruevskit në lidhje me politikat ndaj siç thonë nga forumi, “pakicës shqiptare”.
Vërejtje të veçanta ky forum ka ndaj deklaratave të Gruevskit në intervistën e fundit dhënë për gazetën “Dnevnik”, ku sipas tyre ai ka pranuar se ka qenë transparent me shqiptarët duke ua mundësuar atyre përdorimin e gjuhës, flamurit, amnistimin e terroristëve (ushtarëve të UÇK-së), etj.
“Në intervistë, ai në mënyrë eksplicite i thekson të gjitha çështjet që i ka realizuar në lidhje me pakicën etnike shqiptare duke filluar me përdorimin e flamurit, përdorimin e gjuhës, amnistimin e terroristëve për krime ndaj popullatës maqedonase. Punësim në administratë në sistemin e shqiptarëve, pa e ditur numrin e saktë të shqiptarëve, pasi që ende nuk është bërë regjistrimi”, thuhet në reagimin e tyre.
Ata gjithashtu e kritikojnë Gruevskin për dy universitetet shqiptare, atë të Tetovës dhe “Nënë Terezën” dhe një sërë procedurash tjera, që sipas tyre me këtë delegjitimohet si “patriot nacional”.
Sipas “Forumit të Patriotëve të Lirë”, Gruevski nuk po punon që ta mbrojë popullin maqedonas dhe Kushtetutën, por interesat e tij personale dhe është i gatshëm që të flijojë gjithçka vetëm që të ngelet në politikë dhe të shpëtohet nga keqbërjet e tij.
“Publikisht i bëjmë thirrje Gruevskit që të mbarojë të fshihet dhe ta keqpërdorë partinë për qëllimet personale. Gruevski është koha për ikjen tënde nga vendi i kryetarit të VMRO-DPMNE-së. Koha është për kongres të jashtëzakonshëm”, thuhet më tej në deklaratë.
Ndryshe, këto kritika të adresuara ndaj Gruevskit, si tolerant ndaj shqiptarëve, për opinionin e gjërë në Maqedoni paraqesin një rast të paprecedentë që nuk korrespondon aspak me realitetin dhe paraqitjet e tij. Vetë Gruevskim, prek 15 vitesh me rradhë sa është në pushtet, gjithmonë ka shfrytëzuar retorikë nacionaliste ndaj shqiptarëve.
Përveç tjerash, ai asnjëherë nuk ka lejuar që ndonjë nga funksionet më me peshë në shtet të udhëhiqen nga partitë politike shqiptare. M. Krasniqi – /tesheshi.com/
