Një adoleshent musliman është arrestuar dhe mund të përballet me akuzat për prodhim e një “bombe të rreme” pasi mësuesi i tij mendoi se ora e prodhuar prej tij në shtëpi mund të ishte ndonjë mjet shpërthyes.
Ahmed Muhamed, 14 vjeç nga qyteti Irvin në Teksas, SHBA, kishte bërë një orë e cila ishte e vendosur brenda një kapaku celularësh. Ai e solli orën në shkollë për t’ia treguar mësuesit të tij të inxhinierisë.
Mësuesi i Ahmedit tha se ora ishte “e lezetshme”, por e kishte këshilluar që të mos ia tregonte askujt, raporton e përditshmja Dallas Morning News.
Më pas ora iu mor gjatë orës së gjuhës angleze pasi zilja e saj vazhdonte të binte. Ai i tha gazetës së mësuesja e tij i kishte thënë se ngjante me një bombë. I thashë asaj se “mua nuk me ngjan me një bombë.”
Më pas, ai u nxorr nga klasa nga drejtori i shkollës dhe u mor në pyetje nga pesë oficerë policie përpara se të dërgohej në një qendër riedukimi për të rinj (burg) ku ju morën edhe shenjat e gishtërinjve. Ahmedi, në klasën e nëntë, u pezullua nga shkolla.
Ai tha se nuk pati mundësi të kontaktonte prindërit e tij gjatë marrjes në pyetje. Në një video për Dallas Morning News, ai tha se kjo ngjarje e bëri të ndihej sikur “nuk ishte një qenie njerëzore, por një kriminel.”
Zëdhënësi i shkollës në qytetin Irvin, Teksas, Lesley Weaver lëshoi këtë deklaratë për NBC-DFW: “Ne gjithmonë u kërkojmë studentëve dhe stafit që të raportojnë menjëherë nëse vënë re ndonjë gjë të dyshimtë dhe/apo sjellje të dyshimtë… ne do të marrim gjithmonë masat e nevojshme për të mbrojtur studentë tanë dhe për ta mbajtur bashkësinë e shkollës sonë sa më të sigurt.”
Babai i djalit bashkë me avokatin e tij kanë ndërmend të takohen të mërkurën me shefin e policisë dhe drejtorin e shkollës, raporton ËFAA.
Zëdhënësi i policisë James McLella tha për Dallas Morning News: “Nuk kemi asnjë informacion se ai ka pretenduar se ora ishte bombë. Ai vazhdoi të pohonte se ishte një orë, por nuk dha më shumë shpjegime. Ajo shumë mirë mund të ngatërrohej me ndonjë mjet (shpërthyes) nëse lihet në një banjë apo poshtë ndonjë makine. Shqetësimi ynë është se për çfarë ishte ndërtuar kjo pajisje? A duhet ta arrestojmë atë?”
Këshilli për Marrëdhëniet Islamo-Amerikane (CAIR) tha se po e heton ngjarjen. /tesheshi.com/
