Nga Bashkim Kastrati
Institucionet publike shëndetësore në Kosovë kanë nevojë për më shumë mjekë specialistë dhe infermierë, por një numër i mjekëve që tashmë kanë specializuar vazhdojnë të mbesin pa punë. Në Ministrinë e Shëndetësisë thonë se punësimi i këtyre mjekëve nuk është bërë deri më tani për shkak të mungesës së buxhetit.
Në konkursin e fundit është pranuar një numër i madh i mjekëve. Në Qendrën Klinike Universitare të Kosovës (QKUK) janë pranuar për punësim rreth 190 mjekë specialistë nga lëmi të ndryshme. Ky është numri më i madh i mjekëve specialistë që janë punësuar në QKUK përmes një konkursi.
Rreth 260 mjekë specialistë, të profileve të ndryshme, kanë punuar me kontrata të përkohshme në Qendrën Klinike Universitare, deri në shpalljen e konkursit, ku më pas janë pranuar 190 prej tyre.
Por jo të gjithë e kanë pasur fatin që të pranohen, pasi që kanë mbetur jashtë sistemit edhe rreth 60 specialistë të papunë, e që pritet të bëhet një zgjidhje edhe për këta mjekë nga Ministria e Shëndetësisë, sidomos kur dihet fakti se spitalet rajonale kanë nevojë për mjekë specialistë.
Por, mjekët specialistë, të cilët kanë mbetur jashtë sistemit të Shëndetësisë konsiderojnë se do të duhej që sa më shpejt t’u bëhet një zgjidhje e qëndrueshme. Një nga ta ka thënë për tesheshi.com se ka qenë pjesë e konkursit të fundit, por, me daljen e rezultateve, ka mbetur jashtë sistemit të Shëndetësisë. Ai thotë se Ministria e Shëndetësisë u kishte premtuar se nuk do t’i lërë pa punë dhe pret që të bëhet një zgjidhje sa më e shpejtë për të dhe gjithë kolegë e tij që tashmë kanë specializuar.
“Nëse nuk na bëhet një zgjidhje sa më shpejtë ne jemi të detyruar që të shohim alternativa tjera. E një nga to është të ikim nga Kosova, ashtu siç kanë bërë shumë kolegë tanë dhe kanë gjetur punë sidomos në Gjermani”, thotë ai.
Në një anketë që ka realizuar Federata e Sindikale e Shëndetësisë së Kosovës, rezulton se prej 1 mijë studentëve të anketuar, 73 për qind e tyre kanë deklaruar se do të ikin jashtë vendit.
Duhet theksuar se në vitet e fundit qindra mjekë dhe infermierë kanë shkuar në Gjermani ku kanë gjetur punë dhe kanë kushte të mira të punës dhe mundësi për t’u ngritur profesionalisht. Ky fakt ka ndikuar që shumë mjekë, infermierë, por edhe studentë të mjekësisë të mësojnë gjuhën gjermane. Pra një numër i konsiderueshëm i tyre janë duke ndjekur kurse të gjuhës gjermane, në mënyrë që të marrin vizën për punë.
Vetëm gjatë tri viteve të fundit kanë ikur më shumë se 400 mjekë në vendet e Bashkimit Evropian. Fakulteti i Mjekësisë është ndër fakultetet më cilësore që ka Universiteti i Prishtinës dhe kuadrot e këtij fakulteti janë pranuar me lehtësi në institucionet e vendeve të BE-së, e veçanërisht nga Gjermania.
Ndryshe, Kosova për t’i përmbushur standardet evropiane, thonë njohësit çështjeve të shëndetësisë, duhet që t’i punësojë në institucionet publike shëndetësore edhe dy mijë mjekë e pesë mijë infermierë, aq sa edhe nevojiten për kokë banori. /tesheshi.com/
