Shqipëria është me të vërtetë e çuditshëm në disa raste dhe edhe më të çuditshëm janë qytetarët e saj. Lidhja me Shtetet e Bashkuara të Amerikës dhe sytë nga perëndimi kanë qenë përherë në qendrën tonë të vëmendjes saqë ish Presidentëve e madje edhe kandidatëve për Presidentë të SHBA-ve iu kemi ngritur buste e iu kemi thurur lavde.
Mjafton këtu të kujtojmë se ish Presidentit Bush i kemi ngritur një bust në qytetin e Fushë Krujës, kandidates Hillary Clinton një bust në qytetin e Sarandës, ndërsa çudia e fundit ka ndodhur në qytetin e Kamzës.
Bashkia e Kamzës ka shpallur Qytetar Nderi presidentin e zgjedhur të Shteteve të Bashkuara të Amerikës, Donald Trump. Ky titull iu akordua Presidentit të 45-të të Shteteve të Bashkuara të Amerikës sot në mbledhjen e radhës të Këshillit Bashkiak të Kamzës.
Këshilltarët e qytetit e votuan në mënyrë unanime projektvendimin në të cilin propozohej shpallja “Qytetar Nderi” të Presidentit amerikan Donald Trump, me motivacion: “Si një model revolucionar i rendit të ri demokratik, një ekspert ekonomik, një negociator në politikat e jashtme, një komunikues mendjemprehtë popullor dhe një udhëheqës i kohëve moderne”./tesheshi.com/
