Kryeministri Kyriakos Mitsotakis përcolli një ndjesë të thellë për tragjedinë hekurudhore të ndodhur në Larisa, me bilanc 57 të vdekur, mes tyre 4 shqiptarë, si dhe dhjetra të plagosur.
I pari i shtetit helen shkruan thotë në një mesazh në rrjete se ua ka borxh të gjithëve dhe mbi të gjitha të afërmve të viktimave. “Sepse vërtet në Greqinë e vitit 2023 nuk është e mundur që dy trena të lëvizin në drejtime të kundërta në të njëjtën linjë dhe askush nuk e ka vënë re”, thotë ai.
Më pas ai shprehet se “ne nuk mundemi, nuk duam dhe nuk duhet të fshihemi pas gabimit njerëzor”. Ai thekson se “fakti që Sistemi i Kontrollit Dixhital do të jetë plotësisht funksional në muajt në vijim nuk është justifikim. E kundërta. Më bën edhe më keq dhimbjen që nuk arritëm ta përfundonim para se të ndodhte e keqja”.
“Drejtësia do të hetojë shpejt tragjedinë dhe do të caktojë përgjegjësinë. Ndërsa në ditët në vijim ministri përgjegjës do të njoftojë ndërhyrjet për përmirësimin e menjëhershëm të sigurisë së hekurudhave deri në përfundimin e Sistemit të Administrimit Elektronik. Tani e kemi për detyrë të qëndrojmë pranë familjeve të viktimave, duke pranuar me guxim gabimet e shtetit”.
Në të njëjtën kohë, ai thekson se këto nuk janë të mjaftueshme dhe se do t’i kërkojë menjëherë Komisionit Evropian dhe vendeve mike ndihmën e tyre në aspektin e njohurive, në mënyrë që më në fund të marren trena modernë. “Dhe unë do të luftoj për fonde shtesë të komunitetit për të ruajtur dhe përmirësuar me shpejtësi rrjetin ekzistues.”
Ai thekson se do t’u propozojë “të gjitha palëve që tani e tutje të angazhohen që në Parlamentin e ardhshëm të krijohet një Komision i Posaçëm që do të hetojë historinë e dhimbshme të hekurudhave greke përgjatë njëzet viteve të fundit. Ajo që nuk është bërë për kaq shumë vite duhet bërë tani dhe shpejt. Të gjithë e dimë se hekurudhat e vendit janë shumë problematike. Është ndoshta shprehja ekstreme e një Greqie që nuk na shkon dhe duam ta lëmë pas”.
E di që shumëkush sot do të kujtojë frazën e një prej paraardhësve të mi se “kjo është Greqia”. “Por jo, nuk është vetëm kjo. Është një Greqi tjetër që na jep shpresë, besim dhe forcë”. /teshesh.com/
