Vizita e kryeministres britanike në Turqi ka vajtur mjaft mirë, me një sërë marrëveshjesh të nënshkruara mes palëve. Theresa May ka nënvizuar në takimet me presidentin dhe kryeministrin rëndësinë e Turqisë si një partner jetik i Britanisë së Madhe.
Por pavarësisht frymës pozitive që e ka shoqëruar këtë vizitë, nuk kanë munguar dhe incidentet, siç është ai i provokuar nga një gazetare e BBC-së.
“Shumë ar në pallatin e Erdoğan-it,” ka shkruar në Twitter Laura Kuenssberg, redaktorja politike e gjigandit informativ britanik.
I menjëhershëm ka qenë reagimi i zëdhënësit të presidentit turk. “Varg gënjeshtrash për ‘arin’ (…) Asgjë nga këto nuk është ar. Vetëm reflekton cilësinë e ulët të gazetarisë suaj,” është përgjigjur İbrahim Kalın.
Një tjetër përgjigje të merituar, me nota ironike, ka marrë gazetarja e BBC-së nga Hasan Doğan, shefi i kabinetit të presidentit turk: “Pra, ju mendoni se çdo gjë e verdhë e shndritshme që shihni është ar? Ua!”
Ka shkuar më tej Mustafa Varank, kryekëshilltari presidencial, që e vë fort në lojë gazetaren: “Hej, Laura, hidh sytë në pallatin presidencial të Erdoğan-it, edhe rojat janë prej ari!” /tesheshi.com/
