Ministri i Jashtëm i Arabisë Saudite, Princi Faisal bin Farhan Al Saud tha pas një takimi me Sekretarin e Shtetit të SHBA, Antony Blinken se vendi i tij do të mirëpriste ndihmën e SHBA-së në ndërtimin e një programi bërthamor civil, por se ka “të tjerë që konkurrojnë për të”.
Farhan, i pyetur për lajmet e fundit se Arabia Saudite po kërkon ndihmën e SHBA-së në ndërtimin e programit të saj bërthamor në këmbim të vendosjes së marrëdhënieve diplomatike me Izraelin, u përgjigj se do të dëshironte që Amerika të ishte një nga ofertuesit.
“Nuk është sekret se ne po zhvillojmë programin tonë bërthamor civil të brendshëm dhe do të preferonim shumë që SHBA-të të ishin një nga ofertuesit. Natyrisht, ne do të donim të ndërtonim programin tonë me teknologjinë më të mirë në botë”, tha ai.
Princi Faisal vazhdoi duke thënë se normalizimi me Izraelin do të kishte “përfitime të kufizuara” pa “gjetur një rrugë drejt paqes për popullin palestinez”, por pa shpjeguar nëse çështja bërthamore lidhet me normalizimin.
“Prioriteti” amerikan
Blinken tha në një konferencë për shtyp së bashku me ministrin e jashtëm saudit se normalizimi i marrëdhënieve të Izraelit me vendet arabe, një proces i njohur si Marrëveshja e Abrahamit, mbetet një “prioritet” i SHBA-së pa komentuar çështjen bërthamore.
Gjatë vizitës dy-ditore, Blinken u takua me zyrtarë të lartë sauditë, duke përfshirë udhëheqësin e vendit, Princin e Kurorës Mohammed bin Salman, me të cilin bashkëorganizoi një takim të koalicionit global që lufton ISIL-in. /tesheshi.com/
