Ditë pas akti i tij i njëanshëm dhe tejet i debatueshëm kushtetueshmërisht për anullimin e zgjedhjeve, për më tepër pa u konsultuar me asnjë parti e pa dhënë tjetër datë, ka çuar në ekstrem krizën shqiptare, presidenti Meta ka përcjellë një mesazh të thatë, gati nën një qetësi olimpikë, duke iu bërë thirrje palëve për dialog.
Nuk e thotë se si mund të vijë ky dialog dhe për çfarë konkretisht, e tej kësaj e mbron aktin e tij ç’dekretues, duke thënë se donte t’i shërbente qetësimit të situatës.
“U bënë dhjetë ditë që është në fuqi dekreti i Presidentit të Republikës për anulimin e datës së zgjedhjeve më datë 30 qershor, me qëllim qetësimin e situatës dhe krijimin e mundësive për dialog, që do të normalizonte situatën politike dhe do të krijonte mundësinë për një datë të re të zgjedhjeve vendore, gjithëpërfshirëse dhe demokratike.
Theksoj sërish se nuk është kurrsesi momenti për prova force, për retorikë përçarëse dhe provokuese, por për maturi dhe përgjegjshmëri të lartë për interesat kombëtare të vendit dhe vazhdimësinë e integrimit evropian që është objektiv kombëtar i të gjithë shqiptarëve.
Sërish insistoj me forcë rëndësinë e dialogut mes palëve e njëkohësisht gatishmërinë time për të kontribuar për një zgjidhje sa më të shpejtë”, deklaron Meta.
Për opozitën, akti i tij është bërë lejtmotiv i sulmit ndaj KZAZ-ve, e, edhe për këtë arsye, mazhoranca e akuzon si projektues dhe frymëzues i kamufluar i aksionit politik opozitar. /tesheshi.com/
