Floyd Mayweather fitoi mëngjesin e sotëm duelin e madh të boksit ndaj Conor McGregor, duke triumfuar me “KO teknik” në raundin e 10-të.
Mayweather mbeti i pamposhtur në ring, duke arritur fitoren e 50-të në po kaq sfida të zhvilluara, ndërsa debutimi i irlandezit McGregor në ring nisi me një humbje.
Por ai reziztoi për gati 10 raunde, duke treguar se është një kampion i vërtetë. Mayweather u rikthye në ring pas dy vitesh pushim, por tregoi se nuk ka humbur shkëlqimin.
McGregor, ikonë e arteve marciale mikes, i surprizoi të gjithë në tri raundet e para, duke sulmuar fort dhe vënë jo pak në vështirësi Mayweather.
Këto raunde u fituan nga irlandezi, por më pas ai nisi të ndjejë lodhjen e një sfide me 12 raunde, ndërkohë që amerikani shfrytëzoi të gjithë përvojën e tij. Maywather nis të fitojë një e nga një raundet e tjera, duke përmbysur shpejt shifrat.
Pas raundit të 8-të u pa qartë trendi i duelit, pasi McGregor mezi lëvizte në ring dhe strategjia e tij për ta hedhur “KO” amerikanin në raundet e para nuk funksionoi. Ndërsa Mayweather u tregua i durueshëm, duke shfryrë gjithë inatin në raundet 9 dhe 10, ku dhe vuri në vështirësi irlandezin e UFC-së, që nuk ishte më në gjendje të përballonte ritmin e diktuar nga boksieri amerikan.
Në mesin e raundit të 10-të, pas një serie grushtesh të fuqishme të Mayweather, gjyqtari ndali duelin, duke i dhënë fitoren kampionit amerikan. Por McGregor nuk ra asnjëherë në tapet dhe ky debutim në boks mund të konsiderohet i mirë. /tesheshi.com/
