Anglia dhe Franca u ndeshën në stadiumin legjendar Wembley, ku rezultati ishte në plan të dytë, pasi mesazhi i paqes që dhanë dy vendet, në fund doli të jetë fitimtar. Tifozët anglezë, së bashku me lojtarët e përfaqësueses, u solidarizuan me lojtarët dhe popullin francez deri sa kënduan Marsellesa-n (himnin kombëtar të Francës), të gjithë së bashku.
Tifozët anglezë nderuan viktimat e fundit në Paris me mesazhe të ndryshme. Një numër i madh i tyre mbanin flamuj të shtetit francez, ndërkohë zërat u ndalën për një minutë për të përkujtuar viktimat.
Të dy përfaqësueset zbritën në fushën e lojës me shiritin e zi në krah, ndërkohë trajnerët e dy përfaqësueseve, Hodgson i Anglisë dhe Deschamps i Francës, zbritën në fushën e lojës me lule në duar për të nderuar viktimat që humbën jetën ditën më parë në Paris.
Falë golave të realizuar nga Alli dhe Wayne Rooney, Anglia triumfoi ndaj Francës (2-0), duke dhënë kështu më së miri mesazhin e paqes në një ndeshje futbolli./tesheshi.com/
