Ka ndërruar jetë në moshën 87-vjeçare kardiologu më i famshmën në Shqipëri, Akademik dhe një nga intelektualët më me influencë në vend-Ylli Popa.
Përveç të tjerash, Ylli Popa njohet edhe si mjeku personal i dy personave shumë të rëndësishëm në jetën shqiptare: ish-liderit komunist Enver Hoxha dhe Kreut të Kishës Ortodokse të Shqipërisë, Anastas Janullatos.
Ylli Popa, i thirrur nga Fatos Nano, rimori drejtimin e Akademisë së Shkencave pas vitit 1997, ndërkohë që 7 vjet më para kësaj u bë shumë i njohur në vend me artikullin më të bujshëm në gazetën “Zëri i Popullit” në vjeshtën e vitit 1990 me titull “të fitosh kohën e humbur”, ku i kërkonte kreut të regjimit të asaj kohe, Ramiz Alisë të kryente ndryshime të shpejta politike në vend.
I lindur në Elbasan, Popa ishte një nga pionierët e kardiologjisë shqiptare, për të cilën studioi në Moskë.
Popa megjithatë ka qenë jo aktiv në debatin politik të ditës, megjithëse këshillën e tij e kanë kërkuar shumë nga drejtuesit e vendit, që nga ish-kryeministri Sali Berisha që e ka pasur edhe koleg në Fakultetin e Mjeksisë, por edhe ish-kryeministri Fatos Nano, i cili kishte lidhje miqësore familjare. /tesheshi.com/
