Një nga politikanët më të spikatur të Greqisë, Konstantin Micotaqis ka ndërruar jetë në orët e para të së hënës, lajmëron e përditshmja greke Kathimerini.
Në moshën 98-vjeçare, ai u largua nga kjo jetë i “rrethuar nga njerëzit të cilët i donte dhe e donin,” lexohet më tej në lajmin për vdekjen e tij.
Kryeministër i Greqisë në vitet 1990-1993, Micotaqis do të kishte një karrierë politike më shumë se gjysmëshekullore.
I zgjedhur fillimisht në parlament kur ishte 28 vjeç, ai do të tërhiqej nga jeta parlamentare në vitin 2004, por do të mbetej president nderi i partisë Demokracia e Re.
Një politikan konservator, ai, sipas agjencisë së lajmeve AFP, do të krijonte marrëdhënie të ngushta me presidentin serb Sllobodan Milosheviç, e do ta mbështeste atë në luftërat që pasuan shpërbërjen e ish-Jugosllavisë në vitet ’90 të shekullit të shkuar.
Fëmijët e tij kanë ndjekur të njëjtën udhë; njëri prej tyre, Kiriakos, është kryetari aktual i Demokracisë së Re, partisë kryesore opozitare tani në Greqi. /tesheshi.com/
