Ka ndërruar jetë një nga sportistët më të mirë shqiptarë, por edhe nga njerëzit që sportin e kthyen në një instrument pozitiv për rininë.
Mirjan Hakani, peshengritësi i brezit të artë i viteve 80 është ndarë nga kjo jetë në moshën 55 vjeçare pas disa problemesh shëndetësore në aparatin e zemrës.
Hakani, përveçse kampion dhe rekordmen në peshat e rënda në sportin “elitar” shqiptar, siç është peshëngritja, ka qenë dhe drejtues i sektorit sportiv në bashkinë e Tiranës, ku është shquar në organizimin e aktiviteteve për rininë.
Njeri pasionant, Hakani mbahet mend si gjithmonë i qeshur dhe përhapte pozitivitet tek publiku, kurrë i politizuar ai punoi në bashkinë e Tiranës si me Albert Brojkën ashtu edhe Edi Ramën.
Ai do ta falënderonte Ramën para disa vitesh pas ndhmës për ndërhyrjen mjekësore.
Miri, siç njihej në të gjitha ambientet sportive është sportisti i brezit të artë të viteve ’80, që lanë gjurmë në sportin e peshëngritjes, së bashku me Aleksandër Kondon, Agron Haxhihysenin, Muharrem Berishën, etj. Pas viteve ’90 Hakani ka punuar si drejtues dhe organizator sportiv. Mirjan Hakani është djali i regjisorit të njohur Hysen Hakani.
/tesheshi.com/
