Kenan Evren, udhëheqësi i grushtit të shtetit të 12 shtatorit 1980 dhe presidenti i shtatë i Turqisë, ndërroi jetë mbrëmjen e 9 majit në moshën 98-vjeçare. Ish-shefi i Shtabit të Përgjithshëm po merrte trajtim mjekësor në një spital ushtarak të Ankarasë, në GATA.
12 shtatori i 1980-s është një prej ditëve më të zeza të historisë moderne të Turqisë, në të cilën junta ushtarake e kryesuar nga Kenan Evren mori në dorë pushtetin ekzekutiv dhe ushtroi terror mbi popullsinë.
Pesëdhjetë persona u ekzekutuan, mijëra të tjerë u arrestuan, u torturuan për vdekje, qindra lanë jetën në biruca, dhe shumë të tjerë u zhdukën. Kushtetuta u pezullua, partitë politike u mbyllën, dhe drejtuesit e tyre u morën në pyetje, u proceduan dhe u burgosën. Organeve të shtypit që raportonin kundër puçit ushtarak iu vu kyçi, 14.000 persona që lanë Turqinë u shpallën tradhtarë, e atyre iu hoq shtetësia turke.
Organizatorët e grushtit ushtarak të shtetit, i treti në vend, pretenduan se po kërkonin të vinin rendin pas kaosit të shkaktuar nga përplasja mes grupeve të majta dhe të djathta.
Në vitin 1982 u aprovua një kushtetutë e re, dhe Evreni e mbajti presidencën deri në vitin 1989, ndërsa junta ushtarake ia kishte kaluar pushtetin në 1983-shin një qeverie civile.
Ish-shefi i Shtabit të Përgjithshëm, Kenan Evren, dhe ish-komandanti i Forcave Ajrore, Tahsin Shahinkaja (Tahsin Şahinkaya), dy të mbijetuarit e juntës ushtarake, u dënuan me burgim të përjetshëm më 18 qershor 2014. /tesheshi.com/
