Ish-presidenti iranian Ali Ekber Hashemi Rafsanxhani e la këtë jetë të dielën, në moshën 82-vjeçare. Rafsanxhani ndërroi jetë në spital pasi pësoi një goditje në zemër.
Një figurë kyçe në themelimin e republikës islamike, ai shërbeu si president nga viti 1989 në 1997-n. Vdekja e tij është cilësuar nga autoritetet iraniane si një humbje e madhe.
Rafsanxhani ka qenë më herët dhe drejtues i parlamentit, në dy mandate, gjer në vdekjen e Humeinit, 1989-n.
Presidenti aktual i Iranit, Hasan Ruhani, e ngriti lart figurën e Rafsanxhanit, duke e quajtur një njeri të madh të revolucionit islamik, ndërkohë që Ajetullah Hamenei çmoi miqësinë me të ndjerin, pavarësisht dallimeve.
“Mendimet dhe interpretimet e ndryshme herë pas here në këtë periudhë të gjatë nuk mundën ta prishin kurrë plotësisht miqësinë midis nesh.”
Qeveria iraniane ka shpallur tre ditë zie, në nderim të ish-presidentit. /tesheshi.com/
