Ish-deputeti i Lidhjes Demokratike të Kosovës, Agim Kikaj, ka ndërruar jetë mbrëmë pas mesnatës.
Lajmin për vdekjen e tij e ka dhënë këshilltarja për media e LDK-së, Netja Bejta.
“Jam shumë e pikëlluar për lajmin e vdekjes së njeriut shumë të ndershëm dhe intelektual, deputetit të LDK-së Agim Kikaj. Para disa orësh e takuam në punimet e KP-së; njeri shumë modest dhe optimist për ne të rinjtë,” ka shkruar ajo,
Kreu i LDK-së, Isa Mustafa, ka ngushëlluar familjen Kika, ndërsa ka thënë se Agimi ishte shembull i sjelljes, i komunikimit dhe artikulimit në Kuvend, në aktivitetet e LDK-së dhe kudo tjetër.
Ngushëllime ka shprehur edhe presidenti Thaçi.
I ndjeri ishte deputet në legjislaturën e fundit, të mbyllur para dy javësh. Vdekja mësohet t’i ketë ardhur nga një infarkt në zemër.
Kikaj ishte pjesë e Këshillit të Përgjithshëm të LDK-së, organit më të lartë të kësaj partie.
Ai u lind më 10 shkurt 1963, dhe kishte përfunduar Fakultetin Juridik dhe atë të Letërsisë e Gjuhës Shqipe. /tesheshi.com/
