Ikona e gazetarisë sportive në Kosovë, Agim Binaku, ka vdekur pas një sëmundjeje të shkurtër në moshën 62-vjeçare. Ai ishte zv.drejtor i programit informativ të televizionin privat kosovar RTV 21 dhe redaktor përgjegjës i redaksisë së sportit në këtë televizion, pjesë e të cilit ishte qysh nga fillimet e tij tash e gati dy dekada, ku drejtoi emisionin sportive 2me1.
Binaku ishte emër nga më të shquarit të gazetarisë sportive, jo vetëm në Kosovë por edhe më gjerë. Realizoi mijëra emisione, transmetime të drejtpërdrejta, dokumentarë, reportazhe, intervista me emra të mëdhenj të sportit kosovar, por edhe atij botëror.
Në vitet ‘70 dhe ‘80 punoi në Radio Prishtinë, duke drejtuar emisionin e popullarizuar “Pasditja argëtuese sportive” në epokën e artë të sportistëve kosovarë. Në vitet ’90 ishte themelues dhe kryeredaktor i revistave të para sportive në Kosovë “Reflekset sportive” dhe “Top sporti”.
Agim Binaku u nderua në Tiranë me çmimin mbarëkombëtar të gazetarisë sportive “Anton Mazreku”, si dhe u nderua me një varg mirënjohjesh për punën e tij mbi katër dekada në gazetarinë sportive.
Mbledhja komemorative në nderim të Agim Binakut do të mbahet nesër në “Sheshin 21” në orën 10:30, ndërsa varrimi nesër në varrezat e qytetit në Prishtinë në orën 12:00. /tesheshi.com/
