Takimi mes partisë së djathtë gjermane, Alternativa për Gjermaninë (AfD), dhe Këshillit Qendror të Muslimanëve, i cili përfaqëson mbi 30 grupe të ndryshme islame, është ndërprerë pas gjysmë ore.
Arsyeja e ndërprerjes së takimit, sipas udhëheqëses së partisë Frauke Petry, është refuzimi i këshillit musliman për t’u tërhequr nga krahasimi i AfD-së me nazistët gjermanë.
Ayman Maziek, shefi i Këshillit Qendror të Muslimanëve në Gjermani (ZMD), i cili ka iniciuar takimin në Berlin, ka deklaruar se qëndrimi antiislam i AfD-së nuk është në përputhje me kushtetutën gjermane, ngase bën diskriminimin e një feje të tërë.
Nga ana tjetër, bashkëkryesuesja e AfD-së, Frauke Petry, ka thënë se personalisht është tronditur nga fakti se Maziek e quan AfD-në parti nga epoka e “Rajhut të tretë”.
Për këtë arsye, siç ka thënë ajo, AfD “nuk sheh ndonjë bazë për bashkëpunim”, transmetojnë mediat gjermane.
E themeluar tre vite më parë, me një platformë euroskeptike, kjo parti e kundërshton politikën e dyerve të hapura në Gjermani ndaj fluksit të emigrantëve, që ka rezultuar me një milionë emigrantë vetëm gjatë vitit 2015. /tesheshi.com/
