Kuvendi i Kosovës sërish është kthyer në arenë përplasjesh. Në momentin që po raportonte kryeministri Isa Mustafa, për katër marrëveshjet e arritura në Bruksel, deputetët e opozitës kanë qëlluar me vezë në drejtim të tij. Sigurimi i kryeministrit ka reaguar me shpejtësi, duke e larguar atë nga salla.
Kryetari i Kuvendit, Kadri Veseli, pas situatës së krijuar kërkoi ndërprerjen e seancës. “Nuk është dinjitoze. Ju kisha lut, me sinqeritet po ju lus, jo për hir tonin por për hir të publikut”, tha Veseli.
Punonjësit e sigurimit kanë përdorur çadra për të mbrojtur Mustafën nga sulmi me vezë. Kryeparlamentari Veseli kërkoi që ata të largoheshin nga salla e Kuvendit, dhe më pas me anë të një deklarate ai sqaroi për publikun “se nga ana e personelit të sigurimit të Kuvendit të Kosovës nuk ka pasur asnjëlloj ndërhyrje në asnjë moment. Askush nuk ka të drejtë dhe nuk do të lejohet që të cënojë deputetët në kryerjen e fuksionit të tyre përfaqësues”.
Mustafa, pak para se të goditej me vezë nga opozita, tha se marrëveshjet e arritura në Bruksel janë frut i një bashkëpunimi të ngushtë me Bashkimin Evropian dhe SHBA-të. “Kjo pako është në pajtim me Kushtetutën dhe ligjet e Kosovës”, tha Mustafa, dhe në këtë moment filluan goditjet ndaj tij.
Kryekuvendari Veseli ndërpreu seancën për 10 minuta./te sheshi.com/
Blendi Gashi
