Deputetët e opozitës në Kosovë kanë bllokuar seancën e Kuvendit, një javë pas sulmit me vezë ndaj kryeministrit Isa Mustafa i cili raportonte për marrëveshjet e arritura në Bruksel. Seanca e ditës së sotme u ndërpre, pas bllokimit të foltores nga ana e deputetëve të opozitës.
Ndërkaq, kreu i AAK-së, Ramush Haradinaj me anë të një deklarate të shpërndarë për mediat ka theksuar se opozita nuk ka rrugë tjetër, por vetëm të pamundësojë hyrjen në fuqi të marrëveshjeve për Asocacionin dhe Demarkacionin.
Sipas tij, Isa Mustafa ka gabuar, prandaj “ai duhet ta korrigjojë gabimin e tij, sepse kjo është në interes të shtetit ku ai është kryeministër. Prandaj ftoj atë dhe partnerët ndërkombëtarë që ta kuptojnë shqetësimin tonë dhe t’i rishikojnë këto marrëveshje”.
AAK, sipas Haradinajt, nuk është kundër që serbët, atje ku janë shumicë, ta kenë asociacionin e tyre, por ky asociacion duhet të jetë në përputhje me planin Ahtisaari dhe me Kushtetutën e Kosovës. “Çdo zgjidhje tjetër, është jo demokratike dhe e papranueshme”, thotë ai.
Sa i përket demarkacionit të kufirit më Malin e Zi, AAK i qëndron deklaratave të mëparshme se kufiri të jetë atje ku ka qenë gjithnjë. “Nuk e duam tokën e askujt dhe nuk jemi të gatshëm ta falim tokën tonë. Vetëm një zgjidhje e tillë është garancë e një fqinjësie të mirë me Malin e Zi”, ka theksuar Haradinaj.
Haradinaj ka deklaruar se këto çështje janë jetike për Kosovën dhe i ka ftuar të gjithë njerëzit e vullnetit të mirë, në Kosovë dhe jashtë saj, që të vihen në anën e së drejtës, e jo të mbështesin zgjidhje të improvizuara me pasoja të pariparueshme. /tesheshi.com/
