Ndërprerja e ndeshjes mes Tiranës dhe Partizani, mbrëmë në stadiumin “Selman Stërmasi” për shkak të ikjes së panjoftuar të energjisë elektrike, si dhe “zhytja” në terr për mbi një orë të gjithë kryeqytetit ka qenë e qëllimshme.
Lajmi konfirmohet nga vetë drejtori i Divizionit të Shpërndarjes, pranë OSHEE-së, ing.Petraq Lika, pasi sipas tij një defekt në N/stacionin Qendër 110/20 kV u shënua një avari, që mund të vinte në rrezik të gjithë objektin.
“Rreth orës 19.20 u shfaq një fenomen i padëshirueshëm, ai i dëmtimit të izolacionit të një kabulli fuqie i cili rrezikoi “jetën e pajisjeve”. Personeli operativ për të shmangur rreziqet e mundshme që mund të ndodhnin më tej operoi për stakimin e detyruar të menjëhershëm të N/stacionit duke kaluar në regjim avarie dhe marrjen e masave për rikonfigurimin e skemës së furnizimit me energji elektriketë abonentëve. Ndodhur përpara këtij problemi imediat për zgjidhje, OSHEE procedoi me energjizimin e N/stacionit konform standardeve brenda orës 20.40 dhe zhvillimin e rikthimit të skemës normale të furnizimit me energji elektrike brenda orës 21.00, duke garantuar furnizimin me energji elektrike në mënyrë të sigurt”, u shpreh Lika.
I pyetur për zbatimin e protokollit zyrtar që OSHEE duhet të informonte në rajonin e Tiranës, për marrjen e masave shtesë, Lika u shpreh: “Pavarësisht se çfarë ndodhi, ne jemi pjesë e shoqërisë që duhet të procedojmë sipas detyrimeve ligjore, protokolleve zyrtare dhe masave organizative të çdo institucioni për eventet e rëndësishme, për të shmangur dhe paraprirë çdo situatë të pakëndshme”./tesheshi.com/
