Kreu demokrat Basha ka reaguar sërish në lidhje me heqjen e ndihmës ekonomike për dhjetra familje. Ai ka kundërshtuar fort arsyetimin kryeministrit Rama se ndër ta ka patur shumë që nuk e kanë merituar. E mbi të gjitha, thotë Basha, puna që pretendon kryeministri nuk ekziston.
“Rama e bën këtë gënjeshtër për t’i shpëtuar një fakti të dhimbshëm dhe përgjegjësie. E para nuk ka vende pune, ekonomia në krizë, fryma armiqësore ndaj biznesit, TVSH që tani pritet t’i vihet mbi shpinë sipërmarrjes së vogël. Nuk ka vende pune në Berat, në asnjë vend, asnjëe qytet të Shqipërisë. Përkundrazi, vendet e punës po mbyllen. Shumica dërrmuese e këtyre familjeve nuk kanë asnjë mundësi tjetër përveç ndihmës ekonomike. Ku janë këto vendet e punës që nuk i marrin shqiptarët, se pranokan më mirë dy thasë miell se sa 300-400 mijë lekë në një vend normal pune. Sigurisht që nuk janë dhe nuk janë as në fantazinë e Edi Ramës. Ai abuzon dhe fsheh të vërtetën dhe kjo është një vepër kriminale”, tha Basha.
Ai bëri thirrje për reagim të fortë dhe premtoi betejë po ashtu të fortë politike në parlament, në mbrojtje të familjeve që iu është hequr, siç tha, kafshata e gojës. /tesheshi.com/
