Sot më datë 5 maj, që njihet si Dita e Dëshmorëve të Atdheut, janë zhvilluar homazhe në varrezat e Dëshmorëve nga krerët e shtetit. Për herë të parë janë dy presidentë që bëjnë nderime në këto varreza dhe për herë të parë nuk janë shfaqur simbolet e komunizmit dhe fotoja e diktatorit Enver Hoxha në këto homazhe.
Presidenti në detyrë Bujar Nishani, Presidenti i sapozgjedhur Ilir Meta, kryeministri Edi Rama, ministrja e Mbrojtjes Mimi Kodheli si dhe kryebashkiaku Erion Veliaj ishin bashkë në këtë ceremoni ku vendosën kurora me lule përpara memorialit “Nënë Shqipëri”, në nderim të të rënëve në luftën antifashiste.
Ceremonitë do të vazhdojnë gjatë ditës, ku kryeministri Rama ka parashikuar një drekë me veteranët e luftës, ndërsa kryetari i LSI Petrit Vasili sëbashku me të rinjtë e LRI vendosën kurora me lule te busti i Qemal Stafës. Opozita ka qëndruar jashtë këtyre aktiviteteve.
Dita e Dëshmorëve u vendos të jetë 5 Maji 1942, dita kur u vra nga fashistët, Qemal Stafa, i riu komunist, aktivist i Luftës Nacional Çlirimtare./tesheshi.com
