Sikur ta kishin bërë me fjalë, pas dy deklarimeve amerikane në mbështetje të rezultatit të zgjedhjeve në vend, kanë pasuar të tjera reagime ndërkombëtare me të njëjtin qëllim.
Ambasadori gjerman në Tiranë Peter Zingraf u shpreh:
“Dita e zgjedhjeve të dielën e shkuar rrodhi e qetë dhe thuajse kudo e paqtë. Fakti, që një numër i madh qytetaresh dhe qytetarësh shqiptarë dhanë votën e tyre, bën të qartë dëshirën për të bashkëvendosur. Kodi i ri zgjedhor e kaloi me sukses testin e tij të parë.
Unë shpresoj që të gjithë aktorët politikë të kenë edhe në të ardhmen një qasje konstruktive dhe bashkëpunuese ndaj njëri-tjetrit. Krahas kësaj presim që ata të njohin rezultatin e zgjedhjeve”.
Ambasadori britanik Duncan Norman:
“Urime kryeministit Edi Rama dhe Partisë Socialiste për rezultatin në zgjedhjet parlamentare, si dhe qytetarëve për pjesëmarrjen e tyre, pavarësisht kufizimeve të COVID-19. Theksojmë gjithashtu fushatën e bazuar në programe që zhvilloi Partia Demokratike si dhe rritjen e shënuar në rezultat”, shkruan Norman.
Vijon ministri i Jashtëm italinan Di Maio:
Italia vlerëson organizimin e shkëlqyeshëm të procesit zgjedhor, siç tregohet nga OSBE / ODIHR në raportin e saj paraprak. Pas ballafaqimit elektoral, tani është thelbësore që të gjithë aktorët politikë të jenë plotësisht të përkushtuar për të mirën e vendit dhe të kontribuojnë në konsolidimin e institucioneve demokratike që gjejnë pikën e tyre thelbësore të referencës në një Parlament plotësisht legjitim dhe funksional”.
Kujtojmë se ky reagim në bllok vjen pas kërcëmit të presidentit Meta në nxjerrjen e një dekreti, me gjasë mosnjohjen e zgjedhjeve, si dhe të një reagimi të Berishës me frymë të ngjashme. /tesheshi.com/
