Ndërsa opozita kosovare vazhdimisht po paralajmëron ngritjen e mocionit për rrëzimin e qeverisë “Haradinaj” dhe shkuarjen e vendit në zgjedhje të parakohshme, bashkësia ndërkombëtare nuk po e pëlqen një opsion të tillë.
Përfaqësuesit ndërkombëtarë në Kosovë kanë deklaruar për gazetën “Zëri” se zgjedhjet janë vetëm humbje kohe për vendin tonë, andaj Kosova para kësaj duhet t’i kryejë shumë detyra të mbetura, të cilave deri më tash nuk u janë dhënë epilog.
Ndërkombëtarët me këtë rast u kanë bërë thirrje “institucioneve që të përqendrohen te rezultatet e jo vetëm te politika”. Sipas tyre, Kosova ka shumë sfida të cilat nuk presin, siç është finalizimi i Asociacionit të Komunave me Shumicë Serbe, reformat në Kodin Penal e deri te sigurimi i vendeve të reja të punës. /tesheshi.com/
