Ata janë kthyer në një dyshe, por sot ishin një trio e tribunës së opinionit publik shqiptar. Bëhet fjalë për ambasadorët e SHBA-së, Donald Lu, atë të BE-së, Romana Vllahutin dhe kreun e Prezencës së OSBE-së Florian Rouning.
Pas fshikullimit të përditshëm të politikanëve dhe zyrtarëve të korruptuar, sot diplomatët kishin një tjetër “shuplakë” për politikën shqiptare.
Me diplomaci, ata kanë shtruar pyetjen se çfarë është bërë këto 25 vjet pas rrëzimit të komunizmit dhe pse shqiptarët janë më prapa se të tjerët?
Një pyetje që shtrohet në tryeza e fushata, por asnjëherë askush nuk ka marrë apo i është vënë përgjegjësia e këtij dështimi.
Diplomati austriak, Runing që drejton Prezencën e OSBE-së ka goditur fort gjatë një fjalimi të mbajtur në një aktivitet në kuadër të 25 vjetorit të rrëzimit të diktaturës komuniste.
“Shqipëria nuk mundet më të harxhojë kohë dhe energji me politika jo të duhura. Nuk është në interesin e saj dhe as të BE-së” tha ambasadorja e BE-së, Romana Vlahutin.
Për ambasadorin e OSBE Florian Raunig, 25 vite janë pak në histori, por shumë në jetën e një individi “edhe sa duhet që të përmbushet program ambicioz për një shtet demokratik”
“Në fillim të viteve 90 ndërkmbëtarët dhe sikundër shqiptarët ishin të bindur se një 10-vjeçar do të mjaftonte për të ndërtuar një sistem demokracie dhe ekonomi tregu funksionale. Mbi 2 dekada më vonë kemi edhe shumë për të bërë. 25 vjet mund të mos tingëllojnë shumë në terma historik. Ndërtimi i një demokracie dhe ekonomia tregu nga hiçi në vetëm 25 vjet duket ambicioze, veçanërisht duke pasur parasysh nga ç’pikë u nis vendi, por në jetën e një individi 25 vjet janë shumë. Kjo mospërputhje mund të jetë një prej arsyjeve që nxisin pyetjen me të cilën vijojmë të përballemi edhe sot, pyetjen kuptushmërisht të paduruar: Edhe sa duhet për të përmbushur programin ambicioz për të përvetësuar kulturën e debatit demokratik, respektimin e shtetit të së drejtës për të konsoliduar mirëqënien sociale dhe ekonomike dhe për të siguruar konkurrencën e ndershme të tregut. Si mund të përshpejtojmë procesin në mënyrë që popullsia të fitojë besim në të ardhmen e vendit”?! /tesheshi.com/
