Një nënë dhe vajza e saj gjermane, të cilat u përzunë nga Izraeli, pasi vizat e tyre skaduan, kanë mbi një vit që jetojnë në aeroportin e Qipros, Larnaka.
Të dy gratë, emrat e të cilave nuk bëhen të ditura, flenë në asfaltin e parkingut të makinave me dyshekë kampingu dhe refuzojnë të shkojnë tjetërkund, pavarësisht ditëve të ftohta të dimrit apo vapës mesdhetare.
Ato refuzojnë të shkojnë në Gjermani, pavarësisht ofertës për t’i ndihmuar nga ambasada e vendit të tyre dhe zyrtarëve lokalë.
Autoritetet e aeroportit kanë shumë pak informacion mbi të kaluarën e tyre, por mendojnë se ka ardhur koha që të bëhet diçka. “Ne kemi bërë më të mirën tonë nga ana humanitare për t’i ndihmuar, si në shi ashtu edhe në vapë, por nuk është detyra jonë”, – tha zëdhënësi e Aeroportit të Qipros, Adamos Aspris. “Ne jemi aeroport, jo hotel.”
Nëna gjermane e aeroportit të Qipros, ka të afërm në Izrael dhe do të kthehet sërish, por është në pritje që statusi i tyre të pastrohet nga sistemi.
Zyrtarë nga ambasada gjermane sqarojnë se ajo asnjëherë nuk ka kërkuar ndihmën e tyre, ndërsa punonjës pranë organizatës katolike të ndihmës, Caritas, tregojnë se kur ka raste të tilla me qytetarë europianë në Qipro, janë gati gjithmonë probleme të shëndetit mendor./tesheshi.com/
