Debatet për hetimin e skandalit të CEZ kanë mbërthyer politikën shqiptare. Argumenteve të qeverisë për zgjidhjen me mirëkuptim të konfliktit me kompaninë çeke, pasi mund të humbnin shumë më tepër nëse çështja shkonte në arbitrazh, i është kundërpërgjigjur sot ish-kryeministri Berisha.
Sipas tij, Çekia asnjëherë nuk kishte paralajmëruar një vendim politik për një çështje tregtare, duke deklaruar se republika Çeke nuk e ka kushtëzuar marrëveshjen me qeverinë shqiptare me vendosjen e vetos për dhënien e statusit të vendit kandidat për Shqipërinë.
Berisha ka mbledhur gazetarët për një bashkëbisedim, ku është fokusuar edhe në deklaratat e kreut Çek të Sekretariatit të Energjisë, Janez Kopac.
“Fakti që Kopac deklaron se dy orë mbrapa Çekia tërhoqi veton, tregon qe ky ka qenë një pazar i fëlliqur i Edi Ramës prej dhjetëra milionë euro, koston e të cilit e paguajnë shqiptarët”, deklaroi Berisha.
Sipas Berishës, gjatë kohës që ai ishte në pushtet, “kërkesës së palës çeke për ta zgjidhur me pajtim çështjen, në takimin e Vjenës iu përgjigjëm prerazi jo”. Kjo, pasi pala çeke kishte kërkuar 85 milionë euro e ishte zotuar qe DIA dhe afera e saj të merrej përsipër nga pala çeke. “Ishte një kompani e kontraktuar nga CEZ dhe e dërguar për ndjekje penale nga qeveria ime”, tha Berisha, që e përfundoi deklaratën duke i bërë thirrje kryeministrit Rama të pranojë hetimin ndërkombëtar për skandalin e CEZ-it. /tesheshi.com/
