Qyteti i Volnovakha është një nga qytetet që ka pësuar shkatërrimin më të madh që nga fillimi i sulmit rus në Ukrainë.
Dikur një qytet paqësor dhe një nga 18 distriktet e rajonit të Donetskut të Ukrainës, Volnovakha ka qenë nën kontrollin e ushtrisë ruse dhe separatistëve pro-rusë nga Donetsk që nga 11 marsi.
Qyteti me një popullsi prej rreth 22,000 banorësh ishte objektiv i sulmeve të ashpra ruse, sepse aty strehohej administrata e qarkut. Në katër ditët e luftës, Volnovakha u bë skena e një krize të madhe humanitare, pasi në shtatë ditë u dëmtuan 90 për qind e ndërtesave aty.
Skenat e ndërtesave dhe infrastrukturës së shkatërruar janë si skena nga filmat e luftës. Vendasit janë larguar pothuajse tërësisht nga shtëpitë e tyre dhe qyteti është kthyer në një lloj “qyteti fantazmë”.
Banorja vendase Natalija Terpegorjeva tha për AA se konfliktet në Volnovakha ishin të tmerrshme dhe se fjalët nuk mund të përshkruajnë atë që ndodhi që nga 24 shkurti.
“Njerëzit fshiheshin në bodrume dhe përpiqeshin të mbijetonin. Shtëpia e fqinjit tonë u shkatërrua. Në fillim menduam se shtëpia jonë ishte nën sulm. Doli që bomba ra dhjetë metra larg shtëpisë sonë, e cila po dridhej. Unë u përpoqa të mbroja djalin tim. Veshët e mi u shurdhuan nga shpërthimet,” tha Terpegorjeva.
Duke shprehur dëshirën e saj për të lënë Volnovakhan me djalin e saj, Terpegorjeva tha se qyteti nuk ka të ardhme.
Alexander Kulishenko tha se një bombë shpërtheu pranë tij gjatë sulmit në Volnovakha dhe se ai humbi dëgjimin në veshin e djathtë.
“Ne do të jetojmë nëse fati na ka lejuar të mbijetojmë. Ne nuk kemi zgjidhje tjetër,” vuri në dukje Kulishenko. /tesheshi.com/
