Kurbini është konsideruar si zona më e nxehtë gjatë fushatave elektorale, ku nuk kanë munguar dhe viktimat në raste incidentesh. Prej kësaj zone vjen dhe thënia e famshme “E marr pushtetin vetëm me demokratët e Mamurrasit”, që ka për autor Berishën.
Por ja që në këtë fushatë që sapo është mbyllur, kësaj zone nuk i është ndjerë zëri; ndërkohë që ditë më parë, ‘tesheshi’.com publikoi foto nga rrugët kryesore të qytetit të Laçit, kryeqendër e Kurbinit, pa flamuj partiakë.
Kështu pra, mund të quhet si historike për Kurbinin kjo fushatë, kaluar kaq qetë dhe pa ethet e forta të tifozllëkut partiak, shoqëruar me incidente.
E veçanta tjetër është mbetja pa kandidat e PD-së në këtë zonë, Altin Biba ku pas tërheqjes së tij, Ligji Zjedhor nuk lejonte zëvëndësimin me një kandidat tjetër.
Dhe sa përket kahjes, Kurbini mbahet si bastion i djathtë deri diku, aq sa në vite ka qarkulluar thënia se “sikur PD-ja dhe një kafshë të kandidojë, vota është e sigurtë për të!”.
Kjo metamorfozë e çuditshme e Kurbinit, por veçanërisht e Laçit në këto zgjedhje, ku nga një qytet me ethe elektorale përvëluese, është shndërruar në oaz qetësie, i përngjan dhe asaj në futboll: dikur fusha e Laçit u fuste të dridhurat të gjithë ekipeve që do luanin aty – “Industrial, Industrial, o fitore o skandal!”, ka qenë dikur thirrja bazë e tifozerisë laçiane – ndërsa sot në Laç nuk të preket qimja e flokut.
Edhe kjo pra futet ndër çuditë shqiptare; shyqyr për mirë!
Përgatiti: Ahmet Zani – tesheshi.com
