“Ne nuk e njohim Kosovën, e kjo jo për shkak të dashurisë për Serbinë. Ne i përmbahemi ligjit ndërkombëtar dhe Rezolutës 1244, e cila e trajton Kosovën si pjesë të Serbisë. Ne e trajtojmë Kosovën si një çështje etnike, e cila duhet të zgjidhet nga të dy palët përmes negociatave, siç po bëjmë me Izraelin,” tha ambasadori palestinez në Serbi Mohamed Nabhan, pasi Serbia dhe Kosova nënshkruan një marrëveshje shtatorin e kaluar, komentojnë disa media rajonale.
Palestina ka qenë gjithmonë në anën e Serbisë kur bëhet fjalë për statusin e Kosovës edhe në organizatat ndërkombëtare.
“Ne jemi mirënjohës Palestinës për mbështetjen e saj parimore në lidhje me Kosovën dhe kjo mbështetje është jashtëzakonisht e rëndësishme sepse Palestina vlerësohet shumë, jo vetëm në botën muslimane, por edhe në vendet e tjera”, tha ish-ministri i Jashtëm serb Ivica Daçiç një vit më parë.
Kosovarët nuk e fshehin zhgënjimin ndaj qëndrimit të Palestinës ndaj pavarësisë së tyre. Ish-ministri i Jashtëm i Kosovës Petrit Selimi së fundmi u ka dërguar një mesazh, thotë ai, miqve palestinezë me rastin e hapjes së ambasadës së Kosovës në Jeruzalem.
“Për të gjithë miqtë e mi palestinezë që nuk janë të kënaqur me marrëdhëniet e reja të Kosovës me Izraelin – bisedoni me qeverinë tuaj. Autoriteti Palestinez nuk është mik i Kosovës. Ajo është jashtëzakonisht armiqësore ndaj pavarësisë sonë, ajo loboi kundër anëtarësimit të Kosovës në organizatat ndërkombëtare.”
Konflikti diplomatik midis Kosovës dhe Palestinës do të thellohet edhe më shumë.
Në vend që të ndihmojnë njëra-tjetrën të luftojnë për statuset e tyre, Palestina dhe Kosova kanë rënë viktimë e interesave të palëve të tjera – thuhet në komente. /tesheshi.com/
