Ndërsa Komisioni për Mandate dhe Imunitete në Shqipëri për disa ditë shqyrtoi kërkesën e Prokurorisë për heqjen e mandatit të ish-ministrit të Brendshëm, njëherit deputetit të PS-së Saimir Tahirit, pasi ndaj tij janë ngritur dy akuza: “trafik droge” dhe “korrupsion të zyrtarëve të lartë”, komisioni me të njëjtin emër në Kosovë së fundmi ka debatuar për një çështje krejt tjetër, atë të ndarjes të hapësirave të grupeve parlamentare brenda Kuvendit.
Aktualisht dy partitë më armiqësore në vend, Vetëvendosje e PDK përveç akuzave të vazhdueshme që bëjnë mes vete qoftë në seanca plenare e përmes konferencave, tashmë po përplasen edhe për zyre brenda Kuvendit që të dyja po e synojnë.
Fjala është për zyrën në të cilën për disa vite është vendosur PDK-ja që nga koha kur doli parti e parë e të cilën ende vazhdon të qëndrojë, por kjo po kundërshtohet nga Vetëvedosje e cila thotë se kjo zyrë tashmë ju takon atyre pasi janë partia më e madhe në Kuvend.
Glauk Konjufca, nga Lëvizja Vetëvendosje, në mbledhjen e komisionit për mandate dhe imunitet, tha se edhe pse janë partia e tyre është grupi më i madh parlamentar, Kryesia dhe Kuvendi nuk po ndajnë hapësirën që i takon, për çka ka kërkuar të respektohen praktikat e mëhershme të Kuvendit.
“Unë ju kam drejtuar për ndarjen e hapësirave në kuvend. I vetmi dokument në të cilin mund të lidhen se si ndahen haspirat është rregullorja mendoj që adresimi. Kjo nuk do të kishte ndodhur po të ishte zgjidhur çështja ashtu siç kemi pritur që të zbatohet praktika që është praktikuar më herët. Në janar të viti 2008 Partia Demokratike e ka zënë vendime LDK si partia më e madhe. Ne kemi një zyre për 6 ulëse dhe hapësira e zyrës sonë nuk ka kapacitete më të mëdha. Tash me 32 persona është e pamundshme të funksionojmë. Ju e dini që grupet parlamentare konfirmohen pas themelimit të kuvendit me zgjedhjen e kryesisë. Ne e dimë që kjo procedurë ka përfunduar dhe ne kemi ngritë këtë çështje e sekretaria ka thënë që praktika e deri tash me ka qenë grupi më i madh parlamentar me grupin e dytë me u taku mirëpo kjo nuk po vlen për PDK sepse Xhavit Haliti ka refuzuar dhe ka thënë që si nënkryetar nuk e ka për kompetencë ndarjen e zyrave” tha Konjufca.
Anëtari i Komisionit nga radhët e PDK-së Hajdar Beqa, tha se në kohën kur PDK-ja e ka marrë zyrën nga LDK-ja, Kuvendi nuk ka pasur hapësirë të madhe, ndërsa në vitin 2017 Kuvendi ka shumë më shumë hapësira dhe mund t’i ndahet një zyrë tjetër Vetëvendosje-s.
Kurse deputeti i LDK-së, Arben Gashi, tha se PDK sipas praktikës duhet t’ia lëshoj zyrën VV-së.
“Sa i përket shkresës me sa po kuptoj VV përveç problemit praktik është simbolika e marrjes së zyrës në bazë të praktikave paraprake. PDK më herët ja paska marr LDK-së zyrat. Sa i përket legjislacionit rregullores ne nuk kemi çka me u marr me këtë punë por si deklarimin po shihet që paska një praktikë dhe se sa do të merret kryesia me këtë ose le ta bëjnë një zyre edhe më të madhe se të PDK-së për VV ose PDK sipas praktikës t’ia lëshoj zyrën”, tha Gashi.
Ndërsa Bilall Sherifi, deputet i Nisma për Kosovë, tha se partia e tij nuk ka fuqi për ta detyruar PDK-në për të lëshuar zyrat.
“Unë pranoj argumentin që ka pasur një praktik dhe që fatkeqësisht PDK nuk po don ta rrespektoj këtë praktikë dhe ne nuk kemi asnjë fuqi për ta detyruar. Rregullorja thotë që grupi më i madh parlamentar duhet të ketë zyra më të mëdha”, tha ai. /tesheshi.com/
