Nga Mensur Krasniqi
Pas idesë për shkëmbim territoresh ndërmjet Kosovës dhe Serbisë, gjegjësisht veriut dhe Luginës, kongresmeni amerikan Dana Rohrabacher tha se Maqedonia nuk është një shtet funksional, e për këtë arsye duhet të ndahet në mes të kosovarëve dhe bullgarëve. Ai thotë se krijimi i Maqedonisë është projekt i dështuar.
Në një intervistë për VizionPlus nga Tirana, Rohrabacher thotë se rrethanat janë krijuar që pjesët e saj (Maqedonisë) t’i jepen shteteve fqinje, përfshi këtu Kosovën dhe Bullgarinë.
“Qëndrimi im është që Maqedonia nuk është një shtet. Më vjen keq, por nuk është një shtet. Ata janë aq të ndarë, sa kurrë nuk do të jenë në gjendje që të shkojnë mirë së bashku. Prandaj, kosovarët dhe shqiptarët e Maqedonisë duhet të bëhen pjesë e Kosovës. Ndërsa pjesa tjetër e Maqedonisë duhet të bëhet pjesë e Bullgarisë apo çfarëdo vendi tjetër me të cilët ata pretendojnë se kanë lidhje”, thotë ai.
Ideja , sipas tij, është se “duam ta mbajmë Maqedoninë gjallë sepse dikush, 30 vjet më parë vendosi që ky ishte konfigurimi që duhet të dalë nga shpërbërja e Jugosllavisë, por kjo nuk çon në një arsyetim që kjo ide të mbahet ende”.
I pyetur nëse administrata e presidentit të sapo zgjedhur të SHBA-ve, Donald Trump mbështet idetë e Rohrabacher, ky i fundit tha ai ka ndikim në politikat e jashtme amerikane dhe se në seancat e ardhshme dëgjimore të Komisionit të jashtëm do të diskutohet edhe çështja e ndryshimit të kufijve në Ballkan.
“Unë kam ndikim në politikbërësit amerikanë tani. Jam kryetari i Komitetit të Jashtëm në Dhomën e Përfaqësuesve që merret me atë pjesë të botës. Ne do të kemi seanca dëgjimore në muajt në vijim. Një nga çështjet që do të diskutojmë është ndryshimi i kufijve në mënyrë që ata të kenë kuptim dhe të sjellin paqe në Ballkan”, u shpreh Dana Rohrabacher.
Kjo deklaratë e kongresmenit amerikan ka nxitur komente si të partive politike ashtu edhe nga opinionistë në Maqedoni.
Për anëtarin e Kryesisë Qendrore të LR-PDSH-së, Flakron Bexhetin, deklarata e kongresistit amerikan ua bën me dije maqedonasve se Platforma e përbashkët e shqiptarëve nuk është aq e ashpër sa planet të cilat i kanë amerikanët me këtë shtet.
“Deklarata e përbashkët e partive politike shqiptare për avancim të barabartë mes shqiptarëve dhe maqedonasve nuk është më e “ashpër” se deklarata e kongresisti amerikan Dana Rohrabcher për ndarjen e Maqedonisë dhe ndryshim të kufijve, andaj ska pse të hezitojë pala maqedonase ta pranojë deklaratën e subjekteve politike shqiptare. Dy deklarat njëra deklarative dhe tjetra e shkruar përbëjnë realitetin e politikës në Maqedoni. Varet Maqedonia për kë do të përcaktohet! Shqiptarët janë aty!”, shkroi Flakron Bexheti nga Lëvizja për Reforma në PDSH në llogarinë e tij në Facebook.
Sipas analistit politik Nijazi Muhamedi, deklarata e Rohrabacher i’u kthye si bumerang ish-kryeministrit dhe liderit të VMRO-DPMNE-së, Nikolla Gruevski meqë ky i fundit mezi priste marrjen e pushtetit të SHBA-së nga republikanët në krye me Donald Trump. Dhe tani që Trump drejton SHBA-të, kongresmeni i tij kërkon ndarjen e Maqedonisë.
“Kjo deklaratë ia bëri dardhë pikërisht Gruevskit që mori yrysh sikurse edhe serbët se zgjedhja e Presidentit Tramp do t’ua ndreqë mbetjen ose ardhjen në pushtet skotave të korruptuara të Ballkanit. Për qytetarët e Maqedonisë tash do forcohet edhe më tepër bindja se ambasadori i SHBA-ve në Shkup ekselenca e tij, ambasadori Bejl ka qenë dhe është patrioti i sinqertë dhe më i madh i Maqedonisë bashkë me ambasadorët para tij të SHBA-ve. Me anë tjetër edhe ky kongresisti republikan e kish bërë një deklaratë që s’është në frymën e politikës së jashtme amerikane për Ballkanin e cila sa i përket Maqedonisë është e qartësuar dhe e zbatuar me konsekuencën më të madhe qysh nga viti 1952 e veçmas qysh në fillimet e zhbërjes së ish Jugosllavisë se ishte ky pozicion gjeopolitik e gjeostrategjik amerikan që Maqedoninë e shpëtoi nga mospërfshirja e saj nga luftat e Millosheviqit e jo mendja e Gligorovit që shpifi oazën e rreme të paqës në Maqedoni duke bashkëpunuar bashkë me atë kundër shqiptarëve. Të kujtojmë vetëm një fakt të tij se në ngjarjet e Gostivarit kanë ndihmuar edhe policët serbë”, deklaroi për tesheshi.com analisti politik, Nijazi Muhamedi.
Ndërsa kryeredaktori i gazetës “LAJM”, Isen Saliu vlerëson se pikërisht qeverisja e shtetit nga parti të papërgjegjshme ka bërë që të mosfunksionojë shteti dhe e drejta në Maqedoni. Andaj sipas tij, duke u nisur nga kjo kanë lindur mendime të faktorit ndërkombëtar për ndarjen e Maqedonisë.
“Mosfunksionimi i shtetit gjatë gjithë këtyre viteve, dhe qëndrimi në pushtet i partive të papërgjegjshme që kanë shkatërruar të gjitha vlerat, e posaçërisht marrëdhëniet ndëretnike, nxisin mendime si ky i z. Roharbacher se zgjidhje e vetme për Maqedoninë mund të jetë ndarja e vendit. Për të dëshmuar të kundërtën, nuk duhet kritikuar kongresistin Rocharbacher, por duhet përmirësuar politikat në Maqedoni dhe duhet ndërprerë urgjentisht diskriminimin që po u bëhet shqiptarëve”, deklaroi për tesheshi.com Isen Saliu.
Kujtojmë se Dana Rohrabacher, në administratën e re të presidentit Trump, është përzgjedhur si kryetar i Komitetit të Jashtëm, detyra e të cilit është politikbërja amerikane jashtë SHBA-ve.
Po ashtu, Rohrabacher ka qenë edhe ndihmës i ish-presidentit Ronald Regan. /tesheshi.com/
