Kryeministri britanik Boris Johnson tha sonte se Britania e Madhe ka lirinë në duart e saj dhe se duhet ta shfrytëzojë atë në maksimum.
“Mbretëria e Bashkuar tani mund t’i bëjë gjërat ndryshe dhe më mirë nëse është e nevojshme,” tha Johnson.
Mbretëria e Bashkuar u largua nga tregu i vetëm i BE-së dhe bashkimit doganor sonte në orën 11 pasdite me kohën e Londrës dhe në mesnatë me kohën e Evropës Qendrore, ndërsa u largua politikisht nga Unioni në 31 janar.
Ndryshimet historike të rregullave për udhëtimet, tregtinë, imigracionin dhe sigurinë do të hyjnë në fuqi.
BE dhe Mbretëria e Bashkuar arritën një marrëveshje tregtare në 24 dhjetor, e cila përcakton se nuk do të ketë detyrime doganore kur importohen mallra nga 1 janari.
Zyrtarët britanikë këmbëngulin se sistemet e reja kufitare janë gati për të punuar, ndërsa disa kanë frikë se do të ketë vonesa në porte.
Për të zvogëluar rrezikun e mbingarkesës, MB do të prezantojë gradualisht procedura të reja doganore për produktet e BE deri në korrik 2021.
Disa procedura doganore do të hyjnë në fuqi sonte dhe ato i referohen importit të alkoolit, duhanit, kimikateve dhe substancave të kontrolluara psikoaktive.
Vendet e BE do të prezantojnë deklaratat doganore dhe format e tjera të kontrollit mbi importet nga Britania e Madhe në mesnatë.
Ndryshe nga pjesa tjetër e shtetit britanik, Irlanda e Veriut do të vazhdojë të ndjekë shumë prej rregullave të BE, ndërsa kufiri i saj me Republikën e Irlandës, një anëtar i Unionit, do të mbetet praktikisht i padukshëm. /tesheshi.com/
