Ilir Deda, deputet i Alternativës në Kuvendin e Kosvës, i ka dërguar një letër të hapur presidentit Thaçi. Me shkas “ndarjen e territorit” të Kosovës, një temë e përfolur këto ditë, dhe gjithashtu e aluduar se mund të ndodhë, Deda kërkon nga kreu i shtetit ose të dorëhiqet ose Kuvendi do e shkarkojë.
“Veprimet e Juaja, tash të shpërfaqura edhe publikisht në lidhje me “korrigjimin e kufijve” të shtetit tonë me Republikën e Serbisë, që e nënkupton ndarjen e Kosovës, janë thellësisht veprime anti-shtetërore dhe janë në kundërshtim të plotë me interesat vitale kombëtare…
angazhimi i Juaj politik për ndarjen e Kosovës është aventurë politike që do të shpien vendin tonë në tragjedi njerëzore me ç’rast edhe vetë ekzistenca e shtetit do të vihet në pikëpyetje, duke e zhbërë atë.
Ju nuk jeni duke menduar as për njerëzit as për resurset ekonomike në territoret që doni t’i ‘korrigjoni…”, shkruan Deda, që më pas rendit të gjitha resurset që humb Kosova në rast ndarjeje.
“Prandaj, Ju bëj thirrje publike që pa ekuivoke të tërhiqeni nga aventura të tilla politike dhe të jepni dorëheqje. Dorëheqja e Juaj do ta shpëtonte Kosovën nga shkatërrimi, dhe Juve do të ju mundësonte që të jetoni në Kosovë si një ish-udhëheqës dhe qytetar që i ka pranuar gabimet e veta, dhe është penduar për ato. Pranimi i gabimit është akt fisnikërie, ndërsa zbatimi i planeve për zhbërje të Kosovës është krim dhe tradhëti.
Nëse Ju nuk jepni dorëheqje të menjëhershme, do të ndesheni me Kuvendin e Kosovës, të cilit nuk i mbetet rrugë tjetër përpos të fillojë procedurën e shkarkimit Tuaj nga pozita e Presidentit të Kosovës për shkak të rrezikimit të tërësisë territoriale të Kosovës dhe rendit të saj kushtetues”, mbyll letrën e tij deputeti Deda. /tesheshi.com/
