Një i ri lezhian u arrestua me një arsenal armësh në afërsi të Shëngjinit, ku siç tha, ishte nisur për të vrarë disa politikanë në Lezhë.
Në kokë, ai, 35-vjeçari Antonio Leka, bir i një ushtarakeje, mbante dhe një qeleshe. Po ashtu mbante veshur dhe një jelek antiplumb.
Kanë qenë familjarët ata që kanë tentuar ta ndalojnë dhe kanë njoftuar policinë, pasi djali i tyre u kishte thënë se “do shkoj të vras politikanët në Lezhë, pasi ishte mërzitur me ta”.
Pra, dyshohet për një person me probleme mendore, të ngjashëm me atë që goditi Berishën me grusht.
“Gjatë kontrollit të ushtruar në automjetin e tij, shërbimet e Policisë gjetën dhe sekuestruan në cilësinë e provës materiale: 1 armë zjarri pistoletë me 5 karikatorë, 1 automatik me 5 karikatorë, 550 fishekë luftarakë për pistoletën dhe automatikun, 1 palë dylbi, 1 antiplumb ushtarak, 1 thikë, 1 çantë ushtarake, 75 gramë lëndë e dyshuar narkotike kanabis dhe rroba kamuflazhi”, thuhet në komunikatë.
“Për shkak të sekretit hetimor, duke qenë se ngjarja është në hetim, nuk jepen detaje të tjera në lidhje me motivet dhe objektivin e synuar nga i arrestuari”, deklaron Policia e Lezhës. /tesheshi.com/
