Pështjellimit, bllokimit dhe ndalimeve në aeroporte pas nxjerrjes së urdhrit ekzekutiv të Trump-it javë më parë mësohet se nuk i ka shpëtuar as i biri i të ndjerit Muhammad Ali, boksierit të famshëm.
Raportohet që ai të jetë ndaluar në një aeroport të Floridës së bashku me të ëmën më 7 shkurt, teksa ktheheshin nga Xhamajka.
Në Fort Lauderdale-Hollywood International Airport, Muhammad Ali Jr. dhe Khalilah Camacho-Ali janë hequr mënjanë për shkak të emrave të tyre me tingëllim arab, ka bërë të ditur miku dhe avokati i familjes Chris Mancini.
E ëma është lënë e lirë pasi ka treguar një foto me ish-bashkëshortin, ndërkohë që 44-vjeçari, i biri i Muhammad Ali-ut, është mbajtur dhe është pyetur për dy orë.
“Nga e morët emrin?” “Jeni musliman?” Këto kanë qenë dy prej pyetjeve ku është këmbëngulur nga zyrtarët e emigracionit ndërsa Muhammad Ali Jr. është ndaluar.
Edhe pse ai është i lindur në Filadelfia dhe ka një pasaportë amerikane, pyetjet për të kanë vazhduar.
Sipas Chris Mancini-t, për familjen e Muhammad Aliu-t është e qartë si kristali se ndalimi ka lidhje me iniciativën e shumëdebatuar të Trump-it, urdhrin ekzekutiv të 27 janarit, që ua ndalon hyrjen në SHBA qytetarëve të shtatë vendeve me shumicë muslimane.
“Imagjinoni të ecni në aeroport dhe të pyeteni për fenë tuaj,” është shprehur avokati i familjes Ali, siç raporton Courier-Journal.
Familja e boksierit të madh nuk e ka lënë me kaq, duke kërkuar të gjejë se sa të tjerë janë përballur me të njëjtin trajtim. /tesheshi.com/
