Me hyrjen e dhjetëditëshit të fundit të muajit të shenjtë të Ramazanit, mes forcave policore izraelite dhe besimtarëve muslimanë ka patur përplasje të vazhdueshme për shkak të lejimit të vizitorëve jomuslimanë që ta vizitojnë kompleksin e xhamisë el-Aksa në Jerusalem.
Këto dhjetë ditë shoqërohen me një shtim të adhurimit, të lutjeve, nga ana e muslimanëve, dhe prej tyre shihet si e papranueshme që ndërkohë në kompleksin e xhamisë el-Aksa të ketë vizitorë që nuk i përkasin besimit të tyre.
Personat përgjegjës për xhaminë i kanë akuzuar autoritetet izraelite për shkelje të marrëveshjes së heshtur për të mos i lënë jomuslimanët që ta vizitojnë kompleksin gjatë dhjetë ditëve të fundit të Ramazanit.
Nisur nga ç’është dëshmuar në ditët e fundit, autoritetet izraelite kanë lajmëruar sot mbylljen e kompleksit të xhamisë el-Aksa për vizitorët jomuslimanë, qofshin ata hebrenj apo turistë.
Një zëdhënës i policisë izraelite ka deklaruar se vendimi do të jetë i zbatueshëm gjer në mbarim të muajit të Ramazanit.
“Kjo është një procedurë standarde për arsye sigurie,” ka informuar Micky Rosenfeld.
I quajtur Mali i Tempullit nga hebrenjtë, kompleksi i xhamisë gjendet në Jerusalemin Lindor. Ai është pushtuar nga izraelitët në vitin 1967, për t’u aneksuar më vonë. /tesheshi.com/
