Janë ndaluar në kryeqytetin turk që nga e hëna tubimet publike dhe manifestimet pas informacioneve për sulme të mundshme terroriste.
Organet qeverisëse të Ankarasë qartësuan nëpërmjet një njoftimi se ndalimi i grumbullimeve të tilla do të ishte i vlefshëm gjer më 30 nëntor, në përputhje me gjendjen e jashtëzakonshme në vend.
Vendimi është marrë për të garantuar sigurinë e njerëzve dhe rendin publik, ndërsa janë siguruar informacione se organizata terroriste po përgatisnin aksione për të goditur Ankaranë.
“Grupe terroriste ilegale po synojnë të kryejnë sulme në provincën tonë, dhe kanë bërë disa përgatitje,” thuhet në njoftimin e zyrës së prefektit të Ankarasë.
Nuk ka, ndërkaq, një specifikim të organizatave terroriste që kanë planifikuar të kryejnë sulme në Ankara.
Kryeqyteti i Turqisë është goditur herë pas herë gjatë dymbëdhjetë muajve të fundit nga sulmet e PKK-së dhe të ISIS-it. Mbi 100 persona u vranë më 10 tetor të vitit të shkuar gjatë një sulmi të tillë terrorist. Në shkurt e në mars të këtij viti ka patur sulme të ngjashme, ku kanë humbur jetën dhjetëra qytetarë. /tesheshi.com/
