Presidenti turk, Recep Tayyip Erdogan i përshkroi hollandezët si “mbetje naziste dhe fashistë”, në një reagim pas përshkallëzimit të tensioneve për shkak të ndalimit nga ana e Hollandës së tubimeve elektorale për referendumin që pritet të mbahet në Turqi. Konflikti diplomatik duket se ka njohur një përmasë të re, ndërsa Hollanda ndaloi tubimin ku do të fliste ministri i jashtëm turk, Mevlut Cavusoglu në qytetin e Roterdamit, në mbështetje të referendumit.
Tubimi u ndalua për çështje sigurie, dhe avionit të ministrit turk iu ndalua të ulej në aeroport.
Kryeministri hollandez, Mark Rutte e cilësoi komentin e Erdogan si “jashtë kontekstit”. Mirëpo, Turqia ka thirrur të ngarkuarin me punë të Hollandës në Ankara për të dhënë shpjegime.
Situata mund të njohë zhvillime të reja, pasi ministrja turke për Familjen do të përpiqet të udhëtojë në rrugë tokësore drejt Roterdamit. Të paktën kështu njoftoi agjencia shtetërore turke e lajmeve Anadolu.
Fatma Betul Sayan Kaya ndodhet në Gjermani për takime të tjera, por ajo planifikon të udhëtojë drejt Hollandës, pavarësisht se takimet e saj në këtë vend janë anuluar.
Presidenti Erdogan reagoi ndaj ndalimit të tubimeve elektorale, duke kërcënuar me bllokimin e fluturimeve nga Hollanda.
Kryeministri Rutte, nga ana e tij, u kundërpërgjigj duke paralajmëruar se kërcënimet e Turqisë me sanksione “e bëjnë edhe më të pamundur gjetjen e një zgjidhjeje të arsyeshme”.
Zyrtarët hollandezë më herët kanë marrë në konsideratë mundësinë që tubimi i planifikuar i Cavusoglu të mund të ishte privat. Hollanda thotë se i vjen keq për mënyrën sesi rrodhën ngjarjet dhe se mbetet e angazhuar për dialog me Turqinë. /tesheshi.com/
