Si rrallë herë më pare, autoritetet e Prishtinës nuk e kanë aprovuar kërkesën e dy ministrave serbë për të realizuar një vizitë në Kosovë.
Dhe pas refuzimit, drejtori i Zyrës për Kosovën, Marko Gjuriç dhe ministri i Mbrojtjes, Aleksandër Vulin, kanë kërcënuar se do hynë rrugëve ilegale për çka Njësistet Speciale të policisë së Kosovës kanë zbarkuar në Veri.
Jetlir Zyberaj, shefi i kabinetit të ministrit të Jashtëm të Kosovës, Behgjet Pacolli ka konfirmuar për Radion “Evropa e Lirë” se kjo ministri ka refuzuar kërkesën për vizitë të Gjuriçit dhe sekretarit të përgjithshëm të presidentit të Serbisë, Nikolla Sellakoviç për shkak të “deklaratave që nxisin tensionim të situatës”.
Ndërkohë që ministri i Jashtëm, Behgjet Pacolli ka paralajmëruar arrestimin e atyre që hyjnë pa leje në territorin e Kosovës.
“Për të hyrë sot në Kosovë nuk kanë leje asnjëri prej tyre, as Gjuriq dhe as Vulin. Kushdo qe futet ilegalisht në Kosovë do të arrestohet”, shkruan Pacolli në Facebook.
Gjuriç dhe ministrat serbë sot kishin paraparë të merrnin pjesë në një tryezë diskutimi me temë “gjendja e serbëve në Kosovë”, te vendi i quajtur “Vojni Remont”, në Veri të Mitrovicës. /tesheshi.com/
