Një ndalim i mëhershëm nga administrata e Trump-it i pajisjeve elektronike në linjat ajrore që nisen nga dhjetë aeroporte në Lindjen e Mesme, në Afrikën e Veriut e në Turqi, drejt SHBA-së mund të shtrihet dhe në disa vende europiane.
Bashkimi Europian, raporton Reuters, ka kërkuar bisedime të ngutshme me këtë rast me Shtetet e Bashkuara, duke deklaruar se kërcënimet për sigurinë janë të përbashkëta.
Në një letër të komisionerëve të BE-së për transportin dhe për migracionin, e të drejtuar John Kelly-t, sekretarit të Sigurisë Kombëtare, si dhe sekretares amerikane të Transportit, Elaine Chao, kërkohen takime të menjëhershme në nivel politik e teknik për të vlerësuar rreziqet dhe masat e mundshme.
Ndërkohë që vendimi nuk është marrë akoma, ai mund të godasë kompanitë e mëdha ajrore europiane, siç janë Lufthansa, British Airways apo Air France.
Ekpertët europianë të sigurisë së aviacionit janë takuar një ditë më parë në Bruksel për të shqyrtuar masat e mundshme në rast të shtrirjes së këtij ndalimi dhe në linjat e Europës.
Turkish Airlines, kompania turke e aviacionit civil, ka filluar tashmë t’u shpërndajë laptop-ë udhëtarëve të saj në business-class që fluturojnë drejt Britanisë. /tesheshi.com/
