Për shumë muaj, 18-vjeçarja Afiya (emri i ndryshuar) nga shteti jugor indian i Karnataka-s po digjte vajin e fenerit deri në mesnatë për t’u paraqitur në provimin e klasës së 12-të dhe më pas në testin konkurrues për të kërkuar pranimin në një kolegj mjekësor.
Por ajo nuk mundi të paraqitej në test, pasi shkolla nuk e lejoi të hynte në sallën e provimeve me hixhab apo shami.
Pasi Gjykata e Lartë e Karnataka-s më 15 mars, mbështeti ndalimin e vendosur nga institucionet arsimore për mbajtjen e shamive brenda ambienteve, shumë studente muslimane ose kanë hequr dorë nga provimet ose po gjejnë mjete alternative për të ndjekur arsimin.
Gjykata vendosi se “mbajtja e hixhabit nga gratë muslimane nuk përbën një pjesë të praktikës thelbësore fetare në besimin islam”.
“Ndihem keq për studimet e mia. Nuk më lejuan të ulem në provim, me hixhab… Nuk do të mund të ulem as në NEET (Testi i pranueshmërisë kombëtare për pranim) për t’u pranuar në kolegj mjekësor.” tha Afija.
Ajo tani po kërkon të pranohet në një shkollë tjetër, ku i lejohet të mbajë hixhab.
“Nuk e di çfarë do të bëhet me të ardhmen time. Ndjej se ëndrrat e mia po shkatërrohen çdo ditë,” tha Afiya, duke shtuar se ajo ndaloi së shkuari në shkollë në shkurt të këtij viti.
Ashtu si Afija, ëndrrat e shumë vajzave muslimane janë shembur, të cilat ishin lënë të zgjidhnin midis identitetit, lirisë, veshjes dhe arsimimit të tyre.
Çështja filloi në janar kur studenteve muslimane iu ndalua të hynin në klasa në një kolegj qeveritar në distriktin Udupi në Karnataka për shkak të veshjes së hixhabit. Më pas, diktatin e ndoqën edhe institucionet e tjera.
Tashmë studentet i kanë varur shpresat te Gjykata e Lartë, e cila po shqyrton çështjen.
“Ne kemi mbajtur hixhab që nga fëmijëria dhe jo kohët e fundit. Ata (kolegji) duhet të na lejojnë të shkruajmë provime duke mbajtur hixhabin. Më parë, ata nuk kishin asnjë problem, por u ndaluan pasi erdhi vendimi i gjykatës,” tha Hiba Sheikh, një tjetër studente që gjithashtu nuk po ndjek kolegjin që nga marsi.
Nuk lejohet hyrja në ambientet shkollore
Ajo tashmë ka humbur një semestër nga kolegji. “Këto ditë po zhvillohet mësimi i semestrit të katërt. Ne nuk shkojmë sepse nuk na lejojnë të hyjmë në ambientet shkollore”, tha ajo.
Sheikh tha se shpresonte që gjykata e lartë do të japë drejtësi.
“Studentet janë të traumatizuar psikologjikisht. Të gjithë janë të tensionuar për atë që do të ndodhë në të ardhmen,” shtoi ajo.
Duke folur për Anadolu Agency (AA), Kidiyoor Nihal, sekretari kombëtar i Organizatës Studentore Islame të Indisë – krahu studentor i organizatës socio-fetare Jamaat-e-Islami tha se çështja ka vënë në rrezik të ardhmen e mijëra studenteve femra.
“Kjo axhendë e qëllimshme, hakmarrëse, e urryer për të mohuar aksesin e studenteve në arsim është një situatë katastrofike që do të rezultonte në humbjen e besimit në institucionet publike dhe që kanë pasoja të gjera,” tha ai.
Nihal tha se situata mund të ishte zgjidhur në mënyrë miqësore në një fazë dhe nivel të hershëm, nëse do të kishte pasi një qëllim për ta bërë këtë.
“Në çdo rast, situata u politizua nga niveli i kolegjit në distrikt, bordet shtetërore dhe gjykatat. Ne mendojmë se dialogu dhe diskutimet janë gurët e themelit të shoqërisë sonë dhe kushtetutës indiane,” tha ai.
Ai tha se duke qenë se ishte një çështje e zgjedhjes personale dhe autonomisë, ai shpresonte se gjykata e lartë do të japë drejtësi.
“Kjo është një pikë referimi e rëndësishme që institucionet tona të tregojnë shtyllën kurrizore dhe të ngrihen në mbrojtje të qytetarëve të këtij vendi”, tha ai.
Qeveria mbron ndalimin e mbulesës
Ish-burokrati i lartë dhe tani një arsimtar, Syed Zafar Mahmood tha për AA se kjo çështje duhet të zgjidhet nga të urtët dhe personat e ditur të komunitetit musliman dhe përfaqësuesit e komuniteteve të tjera.
“Po, hixhabi merr akreditimin e tij nga Kurani i Shenjtë. Por në të njëjtën kohë, Islami gjithashtu kërkon që besimtarët t’i binden ligjit të vendit ku ata jetojnë. Një urdhër i një Gjykate të Lartë në Indi është përfundimtar nëse dhe derisa të rrëzohet nga Gjykata e Lartë. Prandaj, deri më tani, urdhri i Gjykatës së Lartë të Karnataka-s për hixhabin duhet domosdoshmërisht të zbatohet. Një respektim i tillë është i mandatuar nga Kushtetuta e Indisë si dhe nga urdhri kuranor…”, tha ai.
Duke mbrojtur ndalimin e hixhabit, Ganesh Karnik, një zëdhënës i Partisë Bharatiya Janata (BJP) në pushtet i tha AA-së se studentët duhet të ndjekin rregullat dhe rregulloret që drejtojnë institucionet arsimore. “Çdo student i përgjegjshëm duhet të kuptojë përgjegjësinë dhe llogaridhënien e tij dhe të ndjekë rregullat e institucioneve”, tha ai.
Karnik tha se “institucionet kanë rregullat dhe rregulloret e tyre” të cilat duhet të ndiqen njësoj siç “një individ ka të drejtat dhe zgjedhjet e veta.”
“Të gjithë këta studentë nëse janë studentë dhe qytetarë të përgjegjshëm duhet të kuptojnë se detyra e parë si qytetar është të zbatojë rregullat, nëse nuk e bëjnë, atëherë nuk janë të përgjegjshëm. Nëse duan të thyejnë rregullat apo të ndjekin shkollën është vendimi i tyre”, tha ai. /tesheshi.com/
