Kreu i Kuvendit të Kosovës, Kadri Veseli, ka dalë kundër ndalimit dhe më pas ekstradimit për llogari të Ankarasë të 6 shtetasve turq, si të implikuar në lëvzjen Gulen.
“Arrestimi i sotëm i gjashtë shtetasve turq, banorë me leje të vlefshme qëndrimi në Kosovë dhe punonjës në Kolegjin Mehmet Akif të akredituar sipas standardeve përkatëse të Kosovës, nuk përfaqëson as formën e duhur të zhvillimit të sundimit të ligjit, as konsolidimit të nevojshëm të demokracisë. Ndërmarrja e veprimeve të tilla pa respektim të procedurave përkatëse dhe mungesë transparence lë hapësirë të theksuar për mëdyshje për veprimet arbitrare të autoriteteve në fjalë”, shprehet kryteparlamentari kosovar në një status në FB.
Veseli shkon dhe më tej kur kërkon që të mbahet përgjegjësi ligjore ndaj atyre që ndaluan dhe esktraduan shtetasit turq.
“Si shtet demokratik, Kosova në mënyrë institucionale duhet të adresojë përgjegjësinë ligjore të akterëve të involvuar në këtë rast. Po ashtu, arrestimi i shtetasve të huaj në flagrancë për dyshime të pabazuara, nuk korrespondon me vlerat evropiane që duhet t’i përfaqësojë Kosova.
Kosova s’ka alternative tjetër veç rrugëtimit evropian. Kjo, natyrisht, kërkon sundim të ligjit dhe llogaridhënie prej abuzuesve arbitrarë të tij”, thekson Veseli. /tesheshi.com/
