Ylli i kinemasë franceze, Isabelle Adjani ka dënuar ndalimin e veshjes së burkinit në 23 resorte turistike franceze, duke e quajtuar atë si qesharake dhe të rrezikshëm, e duke thënë se po luajnë në duart e ekstremistëve dhe të djathtëve ekstremë.
“Gjithmonë e gjej veten në siklet kur ne dëshirojmë që të imponojmë gjërat duke i ndaluar ato”, thotë ajo.
“Ne nuk mund të ndalojmë femrat nga shkuarja në plazh për shkak të një kostumi, edhe në qoftë se me të drejtë ai kostumm shihet si neo-fundamentalist, i prapambetur dhe shokues”, ka theksuar ajo aktorja e njohur.
Duke u pozicionuar kundër politikanëve të djathtë dhe atyre të majtë, Adjani, 61-vjeçare, një nga aktoret më të vlerësuara franceze dhe vajzë e një emigranti musliman algjerian, tha për gazetën Journal du Dimanche: “E konsideroj debatin e nxehur politik në lidhje me burkinin sa qesharak aq të rrezikshëm”.
Në këtë kohë kur kombi francez po kalon nëpër një situatë të tensionuar pas një serie sulmesh terroriste, politikanët e majtë dhe ata të djathtë po marrin qëndrime të ashpra kundër burkinit, të alarmuar nga rritja e popullaritetit të partisë së ekstremit të djathtë Fronti Kombëtar, në prag të zgjedhjeve presidenciale që pritet të mbahen vitin e ardhshëm.
Resorti i fundit turistik në të cilin është ndaluar bartja e burkinit është në Nice, atje ku së fundi u krye një sulm terrorist që u mori jetën e 86 personave, ngjarje kjo që ka përkeqësuar dukshëm raportet me muslimanët lokalë. /tesheshi.com/
