Figura kryesore e opozitës ruse, Alexei Navalny, ka përshkruar orarin e tij ditor në burgun e sigurisë maksimale ku është transferuar, me punëtori qepjeje dhe “sesione edukative” nën një foto të Vladimir Putinit.
Pas hyrjes në fuqi të vendimit të ri të gjykatës, kundërshtari kryesor i Kremlinit u transferua në mes të qershorit në një burg që ndodhet rreth 250 kilometra në lindje të Moskës, i cili njihet për trajtimin e dobët të të burgosurve.
Në një mesazh të postuar në Instagram, Navalny flet për orarin e tij të zgjimit çdo mëngjes në orën 6:00 të mëngjesit dhe punës në punishten e rrobaqepësisë në objekt.
“Ne kalojmë shtatë orë para një makinë qepëse, ulur në një stol që është më i ulët se niveli i gjurit”, tha Navalny.
Duke qenë se nuk di të qepë, duhet t’i nënshtrohet “aktiviteteve edukative” që konsistojnë në “uljen me orë të tëra në një stol nën portretin e Putinit”.
Nuk e di se çfarë mund të ‘edukohesh’ me atë lloj aktiviteti, përveçse të të shkatërrohet kurrizi”, ka komentuar ai.
E shtuna, tha ai, është një ditë pune pesë-orëshe dhe më pas i duhet ende të ulet në stolin nën portret.
E diela është një “ditë pushimi”, por është e nevojshme të ktheheni sërish në stol “brenda dhjetë orëve”.
Përveç kësaj përditshmërie të ashpër, Navalny thotë se mbetet optimist dhe se ka mësuar përmendësh pjesë të Hamletit të Ëilliam Shakespeare në anglisht.
“Të burgosurit që punojnë me mua thonë se kur mbyll sytë dhe mërmëris gjërat në anglishte shekspiriane, është sikur po thërras demonë”, tha Navalny.
“Por kjo as që më shkon në mendje, sepse thirrja e demonëve do të ishte një shkelje e rregulloreve të brendshme,” tha ai, i cili akuzon rregullisht autoritetet e burgut se i imponojnë vepra fiktive për të shtrënguar kushtet e tij të burgut.
Navalny u arrestua në janar 2021 pasi u kthye nga Gjermania, ku kaloi pesë muaj duke u shëruar nga helmimi me agjent nervor, për të cilin akuzon Kremlini.
Ai u dënua me dy vjet e gjysmë burg për dyshimin se kishte shkelur lirimin me kusht ndërsa ishte jashtë Rusisë.
Në mars 2022, ai u dënua me nëntë vjet burg për mashtrim dhe përbuzje të gjykatës, të cilën ai e përshkruan si një përpjekje të motivuar politikisht nga autoritetet ruse për ta mbajtur atë pas hekurave për aq kohë sa të jetë e mundur.
Vendimi i ri kundër Navalny-t vjen në mes të një goditjeje të ashpër nga Kremlini kundër mbështetësve të tij, aktivistëve të tjerë të opozitës dhe gazetarëve të pavarur. /tesheshi.com/
