Një sistem rotacional do të përdoret për dislokimin e 4.000 ushtarëve të NATO-s në kufijtë e Europës Lindore.
Zëvendëssekretari amerikan i Shtetit, Antony Blinken, ua ka bërë të qartë gazetarëve përmes një telekonferencë të mërkurën se do të jetë një prani e vazhdueshme e ushtarëve, por jo e përhershme.
“Nuk është një prani e përhershme, por një prani e vazhdueshme, mbi një bazë rotacionale. Që do të thotë se ushtarët do të dislokohen për disa muaj, për t’u kthyer më pas dhe për t’u zëvendësuar menjëherë nga një grup tjetër.”
Dislokimi i këtyre trupave është diskutuar dhe planifikuar prej kohësh, ndërsa Blinken ka ofruar dhe një
arsyetim të dislokimit të tyre.
“Sfida në Europën Lindore vjen nga agresioni rus në Ukrainë, që ka cenuar sovranitetin dhe integritetin e një vendi të pavarur demokratik.”
Zëvendëssekretari amerikan i Shtetit ka përsëritur qëndrimin e vendit të tij mbi agresionin rus në Ukrainë: “Veprimet që Moska ndërmori në Ukrainë kanë kërcënuar të vendosin një precedent të ri në tokën europiane, me anë të së cilit parimet bazë ndërkombëtare shtrohen papritur për debat.”
Ai ka vazhduar: “Këto parime thonë se kufijtë dhe integriteti territorial i një shteti nuk mund të ndryshohen me forcë, se është e drejtë e brendaqenësishme e qytetarëve në një demokraci të vendosin për të ardhmen e vendit të tyre, jo e dikujt tjetër. Këto parime shkojnë përtej Ukrainës, përtej Europës.”
Zyrtari i lartë amerikan ka sjellë në vëmendje faktin se pavarësisht armëpushimit në fuqi në Ukrainë që në shtatorin e shkuar, OSBE-ja ka raportuar për 30.000 shkelje të tij, ndërsa 4.000 kanë ndodhur vetëm në një ditë të vetme, më 14 prill të këtij viti. /tesheshi.com/
