Ballkani Perëndimor mbetet një pjesë e rëndësishme e interesave të sigurisë për NATO-n dhe Bashkimin Evropian, tha Zëvendës Sekretari i Përgjithshëm i NATO-s, Mircea Geoan.
“Ne mezi presim të marrim Maqedoninë Veriore si aleatin tonë të 30-të. Ne mezi presim procesin përfundimtar të ratifikimit në parlamentin kombëtar të një prej vendeve aleate. Ne kemi përgatitur tashmë çastin dhe presim një ceremoni të bukur të ngritjes së flamurit për aleatin tonë të ri,” tha për Radio Evropa e Lirë.
“NATO është e pranishme sot në Kosovë. Tashmë kemi mirëpritur Malin e Zi si një aleat të ri. Para kësaj, natyrisht, kemi pasur Slloveninë dhe më pas Kroacinë. Shqipëria është një aleat i rëndësishëm në rajon,” tha Geoana.
“Pra, është e qartë se numri një, aderimi i Maqedonisë Veriore, u arrit përmes një politike me dyer të hapura – realiste dhe të besueshme. Ballkani Perëndimor mbetet një zonë me interes për komunitetin Euro-Atlantik, për NATO-n dhe për BE-në“, tha Zëvendës Sekretari i Përgjithshëm i NATO-s.
Në pyetjen nëse marrëdhënia e ngushtë e Serbisë me Moskën dhe Pekinin është shqetësuese, Geoana u përgjigj se “prania dhe ndikimi i lojtarëve të tjerë globalë në rajon, përfshirë këtu edhe në Serbi”, është duke u monitoruar nga afër.
“Tashmë ne shohim që pjesa dërrmuese e vendeve të Ballkanit janë pjesë e strukturave Euro-Atlantike dhe shpresojmë se kjo do të ketë një ndikim pozitiv në Serbi, politikat e saj dhe mirëqenien e qytetarëve të saj,” tha Geoana, duke shtuar se “Serbia mbetet një lojtar i rëndësishëm në rajonin e Ballkanit, dhe kjo është e padiskutueshme “.
“Po ashtu, sa i përket NATO-s, Serbia është partner, ne po bashkëpunojmë me Serbinë, por natyrisht, këtu ka kufizime në mënyrë që të kemi marrëdhënie më të ngushta, për arsye të dukshme. Kjo është arsyeja pse ne besojmë se bashkëpunimi konstruktiv me Serbinë është gjithashtu një politikë e mirë. “Ne mezi presim negociatat e pranimit të BE me Serbinë dhe vendet e tjera jo-BE”, tha Zëvendës Sekretari i Përgjithshëm i NATO-s. /tesheshi.com/
