Strategjia e Sigurisë Kombëtare, e riparë dhe e përditësuar çdo gjashtë vite, është miratuar dhe nënshkruar nga presidenti rus, Vladimir Putin, dhe mes rreshtave të saj NATO-ja cilësohet si kërcënim për sigurinë e vendit.
Dokumenti për sigurinë, që përvijon përparësitë dhe interesat strategjike të Rusisë, argumenton se për shkak të ekspansionit të NATO-s drejt lindjes, Moska është detyruar të rimendojë strategjitë. Përqendrimi ushtarak i NATO-s dhe afrimi i aleancës në kufijtë e Rusisë shihen si një kërcënim për sigurinë kombëtare të Rusisë. Sipas dokumentit të miratuar, NATO-ja po i shtrin ilegalisht caqet e saj.
Në dokument thuhet se SHBA-të dhe aleatët e tyre kanë ndjekur një politikë konfrontuese kundër politikës së pavarur të brendshme dhe të jashtme të Rusisë.
Megjithatë, në strategji theksohet se Rusia është ende e interesuar për marrëdhënie të mira dhe për dialog të ndershëm me NATO-n, me SHBA-të dhe me BE-në.
Si përparësi kombëtare e Federatës Ruse shihet konsolidimi i pozitës së saj si një prej fuqive kryesore botërore. Në dokument thuhet: “…konsolidimi i statusit të Federatës Ruse si një nga fuqitë kryesore botërore, veprimet e së cilës synojnë të garantojnë stabilitet strategjik dhe partneritet të dobishëm reciprokisht në kontekstin e një bote shumëpolëshe.” /tesheshi.com/
