Aleanca ushtarake euroatlantike është detyruar sot të bëjë një deklaratë për të hequr tërë mjegullën mbi raportet e saj me Turqinë pas ngjarjeve të 15 korrikut.
Deklarata e NATO-s nënvizon me forcë se anëtarësia e Turqisë në të nuk është në diskutim.
“Turqia është një aleate e çmuar, që jep kontribut të qenësishëm në përpjekjet e përbashkëta të NATO-s. NATO i ka në konsideratë kontributet e vazhdueshme të Turqisë, dhe Turqia mund ta ketë në konsideratë solidaritetin e mbështetjen e NATO-s.”
Në deklaratë thuhet se NATO-ja i mbështet vendimet e Turqisë të bazuara në njëzëshmërinë.
Aty kujtohet se sekretari i përgjithshëm i NATO-s, Jens Stoltenberg, i ka telefonuar natën e puçit ushtarak si ministrit të Jashtëm turk, Mevlyt Çavushogllu, ashtu dhe presidentit Rexhep Tajjip Erdogan, duke e dënuar fuqimisht përpjekjen për rrëzimin e institucioneve demokratike të Turqisë, e duke e përsëritur mbështetjen e plotë për to.
Spekulimet mbi marrëdhëniet e NATO-s me Turqinë u dendësuan me vizitën e Erdoganit në Rusi, për t’u dhënë udhë dhjetëra skenareve.
Deklarata e sotme e NATO-s i bën të pavlefshme të gjitha spekulimet e tilla, të nxitura në një kontekst të caktuar. /tesheshi.com/
